Sorento filmilioqataasimasunit isornartorsiorneqangaatsiartoq
Filmimik piviusulersaarummik Kampen om Grønlandimik filmilioqataasut, Film.gl aqqutigalugu ilitsersuisoq Kenneth Sorento sakkortuumik isornartorsiorpaat. Isornartorsiorneqartulli isornartorsiuineq paasisinnaannginnerarpaa.
Filmip piviusulersaarutip Kampen om Grønlandip nalinginnaanngitsumik annertuumillu isornartorsiorneqarnera Film.gl-imit saqqummiunneqarpoq. Ilitsersuisup Kenneth Sorentop isornartorsiuineq tupaallaatiginerarpaa.
Film.gl-imi aaqqissuisut filmimut piviusulersaarummut peqataasimasut arlallit, filmi pillugu ulluni kingullerni oqallinnermut isumammainnik saqqummiisimasut sinnerlugit oqaaseqarpoq. Peqataasimasut ataasiakkaarlutik isornartorsiumminnik kinaassutsiminnilluunniiit saqqummiusserusussimanngillat.
Ilaatigut filmi danskinit isiginnaartunit paasineqarsinnaasunngorlugu suliarineqarnissaanik Kenneth Sorentop filmilioqataasunut oqartarsimanera isornartorsiorneqarpoq.
Oqallinnermi pingaarutilittut isigisariaqartoq
Tamannarpiarlu pissutigalugu eqqortuusorivarput, filmfestivalip ImagineNativep filmip takutinneqarnissaanut itigartitsisimanera:
- Film.gl isumaqarpoq, Kenneth Sorentop taamatut aaqqissuillunilu ilitsersuisarsimanera, inuup nunat inoqqaavinit kingoqqisuunngitsup nunat inoqqaavinut filmiliaata filmfestivalimi takutinneqarsinnaanersoq pillugu oqallinnermi eqqarsaatigissallugu pingaaruteqartoq.
- Kenneth Sorentop aaqqissuillunilu ilitsersuisimanera eqqarsaatigalugu, filmimi oqaluttuarineqartoq nunat inoqqaavisa isaannit isigalugu oqaluttuaanngilaq, Film.gl-ip nalunaarutaani allassimavoq.
Avataaniittunit paasineqarsinnaassasoq
Assiliisartoq Jørgen Chemnitz Kampen om Grønlandimik filmilioqataasimavoq, isornartorsiuinermullu tunngatillugu oqaatigivaa:
- Piviusulersaarummik filmiliortoqarnerani ilitsersuisoq assiliisorlu immiussinernik ilaatigut uteqattaarisariaqartarput, avataaneersunut, matumani inunnut Kalaallit Nunaannut tunngatillugu ilisimasaqarpallaanngitsunut paasiuminartunngortinniarlugu.
- Filmimi takutinneqartoq avataaneersunut paasiuminartunngortinniarneqartarnera, danskinut isiginnaartussanuinnarnut tunngatinneqartanngilaq, nunanilli allaneersut tamarmik eqqarsaatigineqartarlutik, Jørgen Chemnitz oqarpoq.
Klaus Georg Hansenip Sermitsiaq.AG-mut oqaatigaa, Film.gl.imi siulersuisut tamarmiullutik, filmilioqataasimasut isornartorsiutaannik saqqummiinissamut aalajangiisimasut.
Filmimik tapersersuisut
Klaus Georg Hansen naapertorlugu, filmilioqataasimasut Film.gl-imut saaffiginnissimasut filmi suli tapersersorpaat.
Filmilioqataasut ilitsersorneqarsimanermut isornartorsiuinerisa saniatigut, arlalinnik isornartorsiuisoqarpoq.
Isornatoqartinneqartut ilaatigut ilagaat, filmilioqataasut pisuni arlalinni tatineqartutut misigisarsimanerat, tassa ilitsersuisup oqaatsit aalajangersimasut immiussarluunniit aalajangersimasoq kissaatigileraangangu kiisalu filmi naapertuutinngitsutut misinnartumik katiterneqaraangat tatineqartutut misigisarsimapput.
Ilitsersuisoq: Ammasumik ingerlatsisoqarpoq
Ilitsersuisup Kenneth Sorentop Sermitsiaq.AG-mut oqaatigaa, filmilioqataasut isornartorsiuinerat tupaallaatigalugulu paasisinnaanagu:
- Filmilioqataasut pingaarnerit sisamat peqatigalugit ammasumik ingerlatsivunga, takutitassiassaq sorleq filmiliarissallugu soqutiginarnerunersoq ataatsimoorluta aalajangiiffigisarparput. Oqaluttuami takutinniakkatsinni pingaaruteqartutut isigisara filmilioqatinnut saqqummiuttuaannarpara.
- Tamarmik immiussanik tamanik namminneerlutik misissuisarput, kukkusoqarsimagaangat, paatsoortoqarsimagaangat allanilluunniit naammaginngisaqaraangamik oqarsinnaatitaapput. Maluginiarpara Film.gl-imit erseqqissaatigineqartoq, filmilioqataasimasut tamarmik filmimut tapersersuisut, Kenneth Sorento oqarpoq.