Therkildsen nersornaaterujussuarmut piukkunneqarpoq

Atuakkanik saqqummersitsivimmik Milik Publishingimik piginnittoq Lene Therkildsen, Astrid Lindgren Memorial Award-imik, ALMA-mik, nersornaasigassatut innersuunneqarpoq.

Taamatut paasissutissiipput Nunatta Atuagaateqarfia aamma Mette Laustsen, meeqqanut atugaateqarfiup pisortaa.

Nersornaat ALMA-prisen ukiut tamaasa tunniunneqartarpoq atuakkiortunut, atuakkanut assilialersuisunut, oqaluttuanik imaluunniit atuarnermik siuarsaanermik suliniuteqartunut. Lene Therkildsen atuarnermik siuarsaanermik suliniuteqartutut innersuunneqarpoq.

- Meeqqat atuarusutsilerniarlugit pingaaruteqarpoq atuakkanik paasisinnaasaannik nassaarnissaq. Nammineq oqaatsit atorlugit atuarsinnaaneq atuffanneqarsinnaanerlu atuarusussusermik ineriartortitseqataapput. Meeqqat aamma atuakkanik, imminnut ilisarisinnaasaminnik, pisariaqartitsipput. Taamaattumik kalaallit meerartaasa atuarusussisat tapersersoqataaffigerusukkaanni pingaaruteqartorujussuuvoq meeqqat tamakkua atuakkanik oqaluttuanillu kalaallisuunik pisinnaanissaat. Atuakkanik pissapput nammineq pigalugit misigisimaffigisaminnik.

- Taamaattumik Lene Therkildsenip suliai atuarnissamik siuarsaalluinnartuupput, qulakkeeramiuk kalaallit meerartaat taamaattunik atuagassaqarnissaat, Mette Laustsen oqarpoq.

Lene Therkildsen nammineq oqarsimavoq:

- Meeqqanut inuusuttunullu atuakkiat tamatigut pingaartittarsimavakka. Anguniagaasimav oq angajoqqaaat kajungilersinnissaat qitornaminnik atuffassisarnissaannik - aammalu meeqqat namminneq atuarusulersinnissaat. Milik Publishing meeqqanut atuakkianik kalaallisuunik pitsaalluartunik saqqummersitseqataasarusuttorujussuuvoq. Tamanna peqatigalugu isumaqarpunga nunat allamiut meeqqanut atuakkiaat nutsikkat kalaallit atuagaateqarnerat pisuunnguallatsissinnaagaat, imarisaatigut eqqumiitsuliornikkullu, nammineq atuakkortutsinnik assilisartulersuisartutsinnillu kajungilersitsisinnaasumik isumassarsisitsisinnaasumillu.