Ulloq unnuarlu angerlarsimaffinni: Meeqqat angalaqatiginerini attaveqarluartoqarnerulersarpoq
Meeqqat ulloq unnuarlu angerlarsimaffimmiitinneqartut sapaatit akunnerni marlunni angalaqatigalugit sulinngiffeqaqatigineri, meeqqat sulisullu akornanni attaveqarnermut iluaqutaasartoq, sulinngiffeqarluni angalanerup qanoq sunniuteqarneranut nalunaarusiaq inerniliussaqarpoq.
Ulloq unnuarlu angerlarsimaffiit meeqqanut najugaqartunut sulisunullu ataatsimoorlutik angalaqatigiinnissaannik aaqqissuussisarnissaat isumatusaarnerulluarsinnaavoq. Nalunaarusiaq, meeqqat ulloq unnuarlu angerlarsimaffinni najugaqartut feeriarlutik angalasarnerisa sunniutaannik misissuisimasoq, VIVE-mit ingerlaneqartoq taama inerniliussaqarpoq.
- Feeriarnerup sivisunerusumik peqatigiisitsisarnerata kinguneranik meeqqat sulisullu ataasiakkaarlutik attaveqatigiinnerannut pitsanngorsaataasarpoq. Meeqqat taamaalillutik tatiginninnerulersarput sulisunullu angalaqatigisimasaminnut akisussaassuseqarnerusumik pissuseqalersarlutik, VIVE nittartakkamini allappoq.
Misissuinermi Nuummi Mælkebøttecenter meeqqat ulloq unnuarlu angerlarsimaffimmi najugaqartut angalaqatigisarnerinut tunngasunik misilittakkaminik tunniussisuusimavoq. Misissuinermi Danmarkimut 2019-imi feeriarneq aallaavigineqarpoq.
Feeria eqeersaataavoq
Meeqqat ulloq unnuarlu angerlarsimaffimmi najugaqartut meeraanerminni sumiginnarneqarnermik misigisaqarsimasarput. Sulisullu nakkutilliisut akunnerit aalajangersimasuinnaat suliffimmiittarmata, sulisunut tatiginninneq pigileruminaattarsinnaavoq, inuttullu ajornartorsiutit taamaasilluni unammilleruminaassinnaasarlutik:
- Feeriarneq meeqqat inuttut ajornartorsiutiminnik aalllusserusunnerulernerannik piumassuseqalersitsisarpoq, piginnaanitillu upperinerulertarpaat, VIVE-p misissuinerani inerniliussat pingaarnerit ilaat taama allassimavaa.
Tatiginninnerulerput
Mælkebøttecenter, angerlarsimaffinnik pingasunik Nuummi immikkoortortaqartumi meeqqanik 22-nik angerlarsimaffiusoq, Danmarkimut Islandimullu feeriarnissanik aaqqissuussisarpoq.
Feeriarnerup sunniutai paasiniarlugit meeqqat aqqaneq-marluk apersorneqarsimapput, sulisut tallimat oqaloqatigineqarsimapput, meeqqallu 13-it ullorsiutinik immersuitinneqarsimallutik.
- Meeqqat feeriarnerup nalaani misigisarpaat, feeriarnerup siornanut naleqqiullugu, piginnaaneqarnerulaarnertik qunusuinnerulaarnertillu. Meeqqat nuannarinerartarpaat, inersimasut sivisunerusumik ilagisinnaaneri taamatullu sulisut pinnguaqatigisinnaallugit eqqissisimaaqatigisinnaallugillu, nalunaarusiaq "Feeriarnerup Kalaallit Nunaanni meeqqanut inissitanut sunniutaa” inerniliussaqarpoq.
Misissuineq Nuummi Mælkebøttecenterimit imissunneqarlunilu akilerneqarpoq.