nunarsuarmiut kingornussaat
UNESCO-mut qinnuteqaatissaq alla piareersarneqarpoq
Qeqqata Kommuniata Kommune Kujalleq assigalugu neriuutigaa nunap ilaata UNESCO-p nunarsuarmiunut kingornussatut allattorsimaffianut ilanngunneqarnissaa
Qeqqata Kommuniata nunap, Sisimiut Kangerlussuullu akornanniittup, FN-ip ataani UNESCO-p nunarsuarmiunut kingornussatut allattorsimaffianut ilanngunneqarnissaanik qinnuteqaatissani piareersaleruttorpaa.
Isumasioqatigiinneq
Taamaasilluni kommuni sapaammi januaarip 30-anni Sisimiuni Kulturip Illorsuani Taseralimmi annertuumik isumasioqatigiissitsissaaq, tassani innuttaasut soqutigisaqaqatigiillu suliamut akulerutsinneqassallutik.
– Borgmesteritut qilanaaraara UNESCO-mi nunarsuarmiunut kingornussatut isumaliutivut peqatigiiffippassuatta innuttaasullu eqqortutut isigineraat, qanorlu isilluta nuna Sisimiut Kangerlussuullu akornanniittoq atasinnaasumik ineriartortissinnaaneripput, borgmester Hermann Berthelsen tusagassiorfinnut nalunaarutikkut erseqqissaavoq.
Oqaluttuat
Kommunip neriuutigaa piareersaanermut atatilluguy sumiiffimmut tamatumunnga paasissutissanik, oqaluttuanik assinillu pissarsissalluni.
Pallittaalisaq 1700-ukkunneersoq
Qeqqata Kommuniata ilanngullugu tikkuarpaa tamassuma nunarsuarmiunut kingornussassanngortinneqarnissaanut pissutissarpassuaqartoq: Tamaani inuit siulliit, maanna nungoreernikut Saqqaq aamma Dorset, tamaani najugaqarsimapput, tamannalu peqatigalugu piniarnermik kulturi suli attanneqarpoq. Tamanna itsarnitsanik ulikkaarpoq: tuperfikut, issumik qarmat, piniarnermi qamaffiit, ilerrit, teriannissanut pullatit aammalu pallittaalisap 1700-ukkunneersup sinnikui, naatsumik oqaatigalugu qanga ullutsinnilu pisut naapiffiat.
Innuttaasunik ataatsimiititsineq
Suut tamarmik naggaserneqassapput ataasinngornermi februaarip aallaqqaataani innuttaasunik ataatsimiititsinermik, tassanissaaq Naalakkersuisut peqataatitaqassallutik.
2004-mi Ilulissat Kangerluat nunarsuarmi kingornussassat allattorsimaffiannut ilanngunneqarpoq. Qaammammilu matumani siusinnerusukkut naalagaaffeqatigiit Kujataani sumiiffiit tallimat UNESCO-p allattorsimaffianut ilanngunneqarnissaannik qinnuteqarput, qanga qallunaatsiaat najugaqarfigisimasaannut nunaleriffigisimasaannullu.