Unnuk kulturisiorfimmi sammisassarpassuit
Kalaallit Illuutaat Københavnimiittoq mutinik takutitsiffiussaaq, uaajeertoqarluni bluesimillu nipilersorfiulluni
Oktobarip 14-iat ukiumoortumik unnuk kulturisiorfik Københavnimi ingerlanneqassaaq. Aaqqissuussineq københavnimi najugallit tusindilikkaat peqataaffigisartagaat. Amerlasoorpassuit Kalaallit Illuutaat Københavnip qeqqani Løvstrædemiittoq aqqusaartarpaat.
Kalaallit Nunaat pillugu alapernaatsut tamaani susaartinneqarneq ajorput. Unnummi tassani pilersaarutit ilagaat Isaksen Design Bibi Chemnitz peqatigalugu mutinik takutitsissapput. Ole Frimer nipilersortartui blues'inik tusarnaartitsissapput, taakkua nunatsinni bluesmik nipilersornermik katerisimaartitsisareerput. Filmi "Echoes", tassaasoq Anna Kuitse Tastum, Kulusumeersoq pillugu filmiliaq takutinneqassaaq, erinarsoqatigiinnik erinarsortoqassaaq, Lars Møller aamma Anne-Lise Løvstrøm eqqumiitsuliaminnik takutitsissapput aammalu Vivi Nielsen unnuk naggaserlugu uaajiissaaq.
Kaattoqassagaluarpat tamakku Kalaallit Illuutaani suppimik sandwichinilluunniit tamussersorsinnaassapput.