Nanortalik
Utoqqaat angerlarsimaffianni Gitz-Johansenip eqqumiitsuliai saqqummersinneqarput
Aage Gitz-Johansenip suliai Nanortallip katersugaasivianut aamma takuniarneqarsinnaalissapput
Ukiup taartarnera takkutillartorlu Nanortalimmi utoqqaat angerlarsimaffiata torsuusai eqqumiitsuliortup Aage Gitz-Johansenip (1897-1977) kulturitta oqaluttuassartaanik ilusilersugai qalipaasersuipput.
Takuniarneqarsinnaapput
Eqqumiitsuliortup erneraata Jeppe Gitz-Johansenip saqqummersitsineq piumasarisimavaa. Angummimmi ukiorpassuit nunatsinniinnermini sulia inunnik amerlasuunik takuneqarnissai pingaartikkamiuk.
1930-kkunni
Knud Rasmussenip eqqumiitsuliortoq Aage Gitz-Johansen 1930-kkunni Kalaallit Nunaat tikillugu qalipaqqullugu kajumissaarpaa. Taannalu 1930-kkunni Nunatsinnukara ukiut 20-it ingerlanerini Nunarput angalaarsimavaa. Angalanerminilu qalipaasarlunilu takusani eqqumiitsuliarisarsimallugit.
Niviarsiaq naapippaa
Gitzip kalaallisut taaguuteqalerpoq; Qalipaasorsuaq. Maniitsumeerngaarnermini 1933-mi Niviarsiaq Vibeke Lindhardt 'Vips' naapippaa.
Eqqumiitsuliortup tunumiinnermini inuiaat kulturiat qanimut peqataaffigaa. Kalaallillu oqaluttuatoqaat, ileqqulersuutaat upperisaallu aallaavigalugit qalipagarpassuani suliarisimallugit.
Katersugaasivimmut takuniarneqarsinnaalissapput
Aasaru Gitzip eqqumiitsuliai Nanortallip katersugaasiviani saqqummersinneqassapput. Saqqummersitsinermilu qalipagaanit plakatiliat postkortillu pisiarineqarsinnaajumaarlutik.
Jeppe Gitz-Johansen Bornholmi najugaqartoq saqqummersitsinerup ammaanersiorneqarneranut atatillugu Nanortalimmiissaaq. Angummilu inuunera pillugu saqqummiissalluni.
Aage Gitz-Johansenip qalipagai marluk allaaserisap ataani takukkit