Utoqqaat matutik ammarpaat
Alakkaasorpassuit juullimut tunissutissaminnik nassaarput
Ileqqunngortut ilagaat adventip sapaataasa siullersaanni utoqqaat illuat Nuummi Rasmuuseeqqap Aqqusernganiittup matuni innuttaasunut ammartarmagit.
Forstander Rosemarie Elsner illumilu najugallit 46-t taakkunannga arfinillit Tikitami najugallit, ullumi juullerpalaarput alakkaasorpassuit, ilaquttat, ikinngutit illoqarfiullu innuttaasui allat utoqqaat illuannut aqqusaarmata.
Sannavimmi assassukkanik tuniniaasoqarpoq, najugaqartut nammineq suliarisimasaat alakkaasorpassuillu periarfissinneqarput nuersakkanik nissikullattakkanilluunniit juullimut tunissutisinissaminnut. Katerittarfimmi aliikkutariittoqarpoq kaffi kaagillu illugalugit.
Utoqqaat angerlarsimaffianni matunik ammaaneq nal. 14.00-miit 15.30 tungaanut ingerlanneqarpoq, tamatumalu kingorna alakkaasorpassuit Nuummi Arsiffimmut orpiup ikinneranut peqataajartorlutik ingerlaqqipput.