18-inik ukiulik futsalimi unammisartoq Danmarkimi kuultinnaqataasoq
Kalaaleq futsalimi nunanut allanut unammisartoq William Gantzhorn sapaatip-akunnerata naanerani Danmarkimi pissartanngoqataasimavoq.
JB Futsal Gentofte sapaatip-akunnerata naanerani futsalimi Danmarkimi pissartanngorpoq, unammisartut Hjørring Futsla Klub 6-5-imik ajugaaffigisimavaat.
18-nik ukiulik William Gantzhorn Nuummeersoq pissartanngoqataavoq, tamatumalu malitsigisaanik klubbimi unammisartut aappaagu Champions Leaguemut anngunniutissallutik.
- Unamminermi naligeeqaagut, minutsimi kingullermi pingasunik isertitsisoqarluni. Unamminerup taamaatinnissaanut 20 sekundit kisinngoruttut aalajangiisuusumik isertitsivugut pissartanngorlutalu, taanna Sermitsiaq.AG-mut oqaluttuarpoq.
Danmarkimi pissartanngortut
William Gantzhorn februaarip qaammataani JB Futsal Gentoftemut nuuppoq, unammisarnermilu katillugit arfinilinnik isertitsisimalluni.
- Pissartanngorluni nuanneqaaq, tassungami nuuppunga ajugaasarusullunga. Holdi siusinnerusukkut sungiusaqatigisimavara, siulersortillu neriorsorsimavaanga DM-imut peqataassasunga. Maannalu pissartanngorpugut, taanna oqarpoq.
Sverigemi aallartissimasoq
Futsalimi unammisarnini Svergemiittumi Lidköping Unitedimi aallartissimavaa, klubbili qimassimallugu.
- Ineriartornanga misigisimangama klubbimi taamaatissimavunga. Aamma tassani tamakkiisumik sungiusartoqarsinnaanngilaq, unammisartut sungiusartarfimmiit ungasissumi najugaqarnerat pissutigalugu unammisartut amigaataammata.
- Qaammatini pingasuni-sisamani klubbimiippunga, tamatumali kingorna Nuummut angerlarlunga. Taava Gentofte Futsalimiit sianerfigineqarpunga, tassanilu aallartillunga, William Gantzhorn oqaluttuarpoq.
Klubbimullu pissartanngortumut ilanngunniarluni aalajangersimaneq pitsaasuusoq paasinarsivoq.
- Aallaqqaammut unammeriaasiat sungiunniarsimavara. Nuummi unammeriaatsimit allaaneruvoq. Unammsartut pitsaanerupput, arsamillu tigumminniinnarnissaq atugarineruaat aamma tatisimaneqarnermi eqqissisimanerusarput. Klubbimiit nersualaarneqarsimavunga, misigisimavungalu ineriartorlunga. Tamannami aamma tusarfigisimavara, futsalimi unammisartoq oqarpoq.
Klubbit unammersuaartarnerat pitsaanerpaaq
Arsaattarneq tullianik aallartippat futsalimi Champions Leaguemut anngunniunnissaq tullinnguuppoq, tamannalumi qilanaarilluarpaa.
- Champions Leaguemi unamminissa nunarsuarmilu arsaattartut pitsaanerpaavinut unamminissaq nuannissaqaaq. Pissanganarpoq. Neriuppunga unammisaqattaartinneqassallunga. akorluugaraara siunissami nunami allami unammisartunngussallugu, assersuutigalugu Italiami futsalerfiusartut annersaanni. LIgamut pitsaanerusumut siunissami nuukkusuppunga, William Gantzhorn oqarpoq.
Unammisartoqataa Niklas Thorleifsen JB Futsal Gentofvtemi aamma unammisartuuvoq, taannali ajoqusersimanerminik suliaritissimanini pissutigalu unammeqataasimanngilaq. Holdili Champions Leaguemi unammilinnginnerani piareersimassalluni oqarsimavoq.