assammik arsaanneq
Akutaaneq Kreutzmann pisiarineqartut pitsaanerpaat qulit akornanni
Kalaaleq Nordsjælland Håndbold assammik arsartartoq, TV2 Sportimi paasisimasalinnit Danmarkimi assammik arsarluni ukiumi unammisaqattaarfiusumi aallartinnginnerani pisiarineqartuni pitsaanerit qulit akornanniittutut toqqarneqarpoq.
Sermitsiaq.AG-ip allaasereriigaatut, nunanut allanut unammisartoq Akutaaneq Kreutzmann Nordsjælland Håndboldimi ukiumi unammisaqattaarfiusumi unammisartuussaaq, tassani ukioq ataatsimi atuuttussami isumaqatigiissusiornikuugami.
Atuaruk: Akutaaneq Kreutzmann peqatigiiffimmut allamut nuuppoq
Unammisartoq pingaarutilik
Timersoqatigiiffimmit Ribe-Esbjerg HH-mit ukioq ataaseq unammisartooreerluni Nordsjælland Håndboldimut nuunnera, Danmarmik assammik arsarluni unammisaqattaarfiusumi nutaami pisiarineqartut pitsaanerpaat qulit akornanniittoq, TV2 Sportip assammik arsartartunik ilisimasalittaasa nalilerpaat.
- Kalaaleq Aku Kreutzmann backimi saamerlermi Ribe-Esbjergimi ukiumi unammisaqattaarfiusumi kingullermi arsartitaavallaanngilaq, taamaattumillu Nordsjællandimut nuuppoq, ligamiiginnarnissamullu ilungersornermi pingaarutilittut inissisimasinnaavoq, TV2 Sportimi taama naliliisoqarpoq.
Arsarnissamik neriuuteqartoq
Akutaaneq Kreutzmann ukiup unammisaqattaarfiusup tulliani Ribe-Esbjerg HH-mi peqataavallaarnaviarani sungiusaasumit paasitinneqarami, timersoqatigiiffimmut allamut nuunnissani sulissutigaa.
- Unammisaqattaarusuppunga, ingammik aasamut Pan Amerikanske Mesterskabinut peqataasussaatilluta. Nordsjælland Håndboldimi unammisaqattaartassaanga, tamannalu uannut pingaarnerpaavoq, Akutaaneq Kreutzmann taamani nuukkami Sermitsiaq.AG-mut taama oqarpoq.
Danmarkimi angutit 888ligaenimi assammik arsaannerat aggustip naanerani aallartissaaq. Akutaaneq Kreutzmannip timersoqatigiiffia nutaaq, Nordsjælland Håndbold, siullermeerluni septembarip aappaanni unammissaaq.