Angutimmarik arsarluaqaaq
Naggataatigut ajornartorsiuleraluarput ajunngitsumilli naammassillutik. Sisamanngornermi unnukkut Allsvenskanimi unammineq naatsumik oqaatigalugu taamaappoq OV Helsingborg, Angutimmarik Kreutzmannip klubbia illersoraanni
Sisamanngormat OV Helsingborgip Trelleborgimi Trelleborg HBK naapippaa. Unamminerup immikkoortuani siullermi nikinnermi 10 - 10'mik naligiipput. Unamminerup immikkoortuata aappaata qeqqani OV Helsingorborg tallimanik siuaqqavoq. Unamminerulli naajartornerani ajutumiinngajapput, taamaattorli aniguipput taamaasilluni Angutimmarik Kreutzmann aamma OV Helsingborg, pointit marluk pingaaruteqaqisut angerlamut nassarpaat 23-22'mik ajugaanermikkut.
- Isumaqarpunga dommerit unamminerup naajartornerani pissangatitserusussimasut. Unamminerup naalernerani minutsit tallimat kingulliit marluk anisitaapput. Taamaattumik anguneqangajavippugut Angutimmarik Kreutzmann, Sermitsiaq.AG'mut oqarpoq.
- Suli ajoqqusernikuunera qaangivissimanngikkaluarlugu ajunngitsumik arsarpunga.
Angutimmarik Kreutsmann, pingasunik isertitsivoq tunniussaalu arlallit isertitsissutaapput.
OV Helsingborg, unammiuaarnerni normu 3-juvoq, Skånela IF maannamut siuttuugallartut. Kisianni OV Helsingborg klubbinit allanit unamminermik ataatsimik amerlanerusumik unamminikuupput.