Argentinamiu Nagdlunguami pissartanngorniuteqataasoq
Ilulissaneersut Nagdlunguak assammik arsaalluni pissartanngorniunnermi Argentinamiumik ukioq manna unammisartuutitaqarpoq. Argentinameersup nunatsinni misigisai pillugit Sermitsiaq.AG-p oqaloqatigaa.
Constantino Enrico Bagatolli Argentinameerpoq, nunatsinnili assammik arsaalluni pissartanngorniunnermi ukioq manna peqataalluni.
25-nik ukioqarpoq, nunatsinnullu 1. april tikilluni. Tikinnginnermini Kalaallit Nunaat pillugu annerusumik ilisimasaqarsimanngilaq.
- Nalunngisatuannut ilaavoq Kalaallit Nunaat qiianartoq. Tupaallappungali tikikkama qiianartorsuunngimmat, Constantino Enrico Bagatolli illarpoq.
Nunarput nuannarilluinnaraa
Nagdlunguameersoq Milan Olsen Danmarkimi HC Odensemi unammeqatigisareerpaa, aperineqarsimallunilu nunatsinni pissartanngorniunnermi peqataarusunnersoq.
- Aperineqarama eqqarsarpunga nuannerluinnassasoq. Taamaammat akuersivunga. Tikilluaqqulluarneqaqaanga. Nuna kulturilu nuannarilluinnarpakka. Kalaallit Nunaanni unammisarnerup pitsaassusaa ajunngilluinnarpoq, unammersuarnerullu inissisimaffia ajunngeqaaq. Timersortarfissuarmi misigisaq pikkunaqaaq, oqaluttuarpoq.
Nunanut allanut unammisartuusimasoq
Constantino Enrico Bagatolli arfineq-pingasunik ukioqarluni ilaquttanilu Argentinamiit Danmarkimut nuuppoq. Argentina sinnerlugu U18-ini nunanut allanut unammisartuusimavoq, aammalu Danmarkimi Spaniamilu unammisartuunermik misilittagaqarluni.
- Maani unammeriaaseq argentinamiunut spaniamiunullu eqqaanarluinnarpoq, imminut qanillivilluni unamminertut ingerlasarluni. Danmarkimi allaaneruvoq, taktikkeqarnerusarami. Maani allaaneruvoq, allaanerunerali ajortuunngilaq, oqaluttuarpoq.
Sinnattut anguniakkallu
Takorloortuaannarpaa Argentinami nunanut allanut unammisartunngornissani.
- Maani peqataanera allatut eqqarsarneruvoq, immaqa allat misilikkumasimassanngikkaluarpaat. Uannut nukittorsaataassaaq, angerlamullu uteruma maani misilittagarilikkakka aamma atorsinnaavakka. Misilittagarilikkakka tunngavigalugit nukittunerulersinnaavunga unammisariaatsillu eqqarsaatigalugit paasisimasaqarnerulissallunga. Iluaqutigissavara, tamanna qularinngilara, Constantino Enrico Bagatolli oqarpoq.
Nunatsinni pissartanngorniunnerni peqataaqqinnissamut soqutiginnilluinnarpoq. Assammilli arsaannermik inuussuteqalerumagami pissartanngorniutereernerup kingorna Italiamukarnissani takorloorpaa, Italiamilu unammeqatigisartakkani sungiusaqatigalugit. Nagdlunguamili unammeqataanermini pissartanngorniutivinnissamut anngunnissaq siunertaavoq.
- Pissartanngorniutivinnissaq angussavarput, taava kingorna takussavarput susoqassanersoq. Ilulissanulli ujamimik angerlaassinissaq pillugu ilungersussaagut, Constantino Enrico Bagatolli oqarpoq.
Nagdlunguak' NÛK-mut ullumi 29-33-mik ajugaallutik aqagumut pissartanngorniutivinnissamut anngupput. Unamminermi Constantino Bagatolli unammilluarnerpaatut toqqarneqarpoq.