Isikkamik arsaannermi GM
Arsaannermi GM-ertoqarnerani nukkassaatinut ikiaroornartumullu misissuisoqassaaq
GM-ertoqarnerani toqqaannartunik imigassartornermut nukkassaatitornermullu maleruagassaqalerpoq
Isikkamik arsaattartut kattuffiata GBU-p nukkassaatinut allanulluunniit atornerluinermut misissuissutissatik tigoqqammerpaat. Taakku isikkamik arsaannermi Nuummi GM-ertoqarnerani misissuinissani atorneqassapput. Iligiinni marluk unioqqutitsisimasutut paasineqarpata iligiit peersinneqarnerannik kinguneqarsinnaavoq.
Kuummiormiut ukioq kingulleq GM-ertoqarnerani imigassartorsimanerat aalassassimaarutigineqaqaaq. B-67-mi arsaattartut marluk ikiaroornartunik tuniniaasut aamma paasineqarpoq. Pisut K-64-mit B-67-miillu akuersaarneqanngillat.
Ukioq kingulleq taama pisoqareerneratigut GBU ukioq manna GM-ertoqarnissaanut maleruagassanik sukaterivoq. Anngunniunnerni GM-ertoqarneranilu imigassartortoqaqqusaanngilaq - ikiaroortoqaqqusaananilu. Maleruagassat malinneqanngippata timersoqatigiiffinnut kinguneqartitsisoqarsinnaavoq.
Misissortittariaqarneq
- Misissuinissanut atugassavut tigoqqammerpagut. Nukkassaatitorsimasut ikiaroorsimasullu misissuinerni paasineqarsinnaapput. Kikkut misissortissanersut siumut oqaatigereersinnaanngilarput, GBU-p siulittaasua John Thorsen Sermitsiaq.AG-mut oqarpoq.
Misissuinermi taaneqartut qanorluunniit misissortittassapput. Misissortikkumanngitsut ingerlannaartumik unammersuaarnerni peqataaqqusaajunnaassapput.
Iligiinnut kinguneqartitsineq
Nukkassaatitortunik paasisaqartoqassappat aamma maleruagassaqarpoq. Nukkassaatitorsimallutik paasisaasut unammeqataaqqusaajunnaassapput. Iligiinni marluinnaalluunniit taamatut paasisaagaluarunik iligiit unammersuaarnerni tikilluaqqusaajunnaarsinnaapput.
- Maannakkut misissuinerni atortussat piareersaleruttorpagut, John Thorsen oqarpoq.
GM-ertoqarnerani misissuisoqartussaanera qanoq isumaqarfigaajuk? Oqallinnermi ataani peqataagit