Assammik arsarneq: VM-imut anngunniuttoqarnerani inatsiserpassuit malinneqassasut
Assammik arsarnermi nunarsuarmi pissartanngorniuttoqarnissaanut anngunniunniuttoqassanersoq aqagu sisamanngornermi aalajangertoqassaaq. Corona pissutaalluni unammisartunut peqataasunut inatsiserpassuaqassaaq.
VM-imut anngunniunneq Puerto Ricomi ingerlanneqassanersoq aqagu sisamanngornermi ataatsimiinnermi aalajangerneqassaaq.
Unammersuaarneq piviusunngussappat corona pissutaalluni inatsiserpassuaqassaaq. Unammersuaarfik peqataasunit qimaqqusaassanngilaq, aamma unamminerit tamaasa isiginnaartoqarfiunngitsumik ingerlanneqassapput.
Inatsisit unammisartunut qularnaannerpaassapput
Inatsisit malinnissaat ajornassanngisoq nunanut allanut unammisartoq Akutaaneq Kreutzmann oqarpoq.
- Peqataanissamut maleruaqqusat malinneqarnissaat uagutsinnut aamma qularnaannersaassaaq. Inatsisit malinnissaat ajornarnavianngilaq, tassami unammiartorlutaana angalasussaagut, aamma inatsisit pissutaallutik coronamik tunillatseratarsinnaanerput ungasinnerussaaq, Akutaaneq Kreutzmann Sermitsiaq.AG-mut oqarpoq.
Unammersuaarneq allaanerusoq
Coronamik tunillatsittoqannginnissaa anguniarlugu inatsiserpassuit atuutinneqasssapput, unammiffimmi qimaqqusaassanngilaat.
- Unammisartutut aatsaat imatut inatsisilersuisoqartoq misigissavara, kisianni coronamut tunngatillugu maleruaqqusat sungiutereerpagut, tassami inuit qanillinaveersaartarpagut. Aamma unammisartooqatigiilluta immitsinnut tatigeqatigiippugut, inatsisit malillugit unammersuaariartarpugut unioqqutitsissanata. Misilittagaqarnerusut aamma tusarnaarneqartarput, isumaqatigiissusiortoqarsimappat taakku maleqqissaarneqartarput, Puerto Ricoliassagutta aamma taamatut inissisimasoqassaaq, oqaluttuarpoq.
Unammisartut ilaat coronamik tunillatitsissimappat, unammersuaarfimmut iseqqusaajiunnaassaaq. Unammersuaartoqarnerata nalaani, unammisartoq arlaat unammersuaarfik qimallugu allamukarpat, coronamik tunillatsissimasutut nalilerneqassaaq, tunillatsissimannginnermik paasissutissanik peqqaartinnagu unammersuaarfimmut iseqqusaanaviarnani.
Tassa aqagu sisamanngornermi aalajangerneqassaaq, ilumut VM-imut anngunniuttoqassanersoq.