Ujakkaarnermi VM
Assit: Iligiiaarluni sprinternermi Karl-Peter takutitsilluartoq
Unammereernerup kingorna kunngissaq Frederik unammisut ilassivai
Ujakkaarnermi VM-ernermi iligiiaarluni sprintimik unammititsisoqarpoq sapaatiummat. VM Sverigemi illoqarfimmi Falunimi ingerlanneqarpoq.
Iligiit marluk paarlakaajaallutik ingerlaattarput, tamarmik pingasoriarlutik kaajallaasarlutik.
Iligiit 28-t marlunnut avillugit unammipput. Taakkunani arfinillit sukkanerpaat pissartanngorniutivinnernut ingerlaqqillutik. Karl-Peter Kristensen Aasianneersoq Danmarki sinnerlugu unammeqataavoq.
Martin Møllerip ajoqquseqqanini pissutigalugu peqataasinnaannginnera Karl-Peter Kristensen peqataavoq.
Danmarkip nunat sukalasuut soorlu Rusland aamma Norge semifinalimi unammivaa. Kaajallaanermi siullermi Danmarkimit Lasse Hulgaard ingerlaarluarpoq malinnaalluarluni.
Pissanganartumik pisoqarpoq
Karl-Peter Kristensenip kaajallaanera aamma pitsaavoq, tassani tusaamasanut malinnaalluarluni, ujakkaartartut nunanut allanut sungiusaasuat Øystein Slettemark tusagassiuutinut nalunaarummi ilisimatitsivoq.
Kaajallaanerni tullinnguuttuni sukkassuserineqartoq qaffanneqarpoq, Danmarki sinnerlugu peqataasut malinnaasinnaajunnaarlutik.
- Lasse Hulgaard siornatigut pitsaanerusumik angusaqartarpoq, Karl-Peter Kristensen takutitsilluartuulluni. Iligiit unammeqataasut 28-t akornanni 24-tut inissipput, Øystein Slettemark oqarpoq.
Unammineq naammassimmat pissanganalaartumik pisoqarpoq, tassami Lasse Hulgaard apuuttarfiup eqqaani silaaruppoq orlullunilu. Ingerlaannaq napparsimaviliaanneqarpoq, tassanilu unnuisinneqarluni. Uummataani aseruuttoorsimasoq paasineqarpoq, qaammallu ataaseq sinnerlugu eqqissisimaartussanngorpoq.
Karl-Peterip VM-imi unammineri naammassipput
Ujakkaartartup Kalaallit Nunaanneersup VM-eqataanini nuannaarutigaa, unamminerillu marluk tulluusimaarutigalugit. Sprintimi nunarsuarmi 77-tut inissippoq sapaatip akunnerata siuliani.
Iligiiaarluni sprintereernerup kingorna kunngissaq Frederik takkuppoq. Karl-Peter Kristensenilu unammineq kiisalu sungiusartarneq eqqartorpaat. Kunngissap Vasaloppetimut peqataanissaa kiisalu siunissami peqataaffigerusutaa Arctic Circle Race aamma eqqartorpaat.
Karl-Peter Kristensenip VM-eqataanera tamaannga killeqarpoq. Martin Møller 15 kilometerimut fristilimi pingasunngorpat unammeqataassaaq. Qitimigut suli annialaaraluarpoq, kisianni pingasunngorpamut piareersimanissani naatsorsuutigaa.
Assit ataani takukkit