Nuuk
Assit: Sumiissusersiuutigalutik arpattut GM-ernerat ima inerneqarpoq
Sumiissusersiuutigalutik arpannermi pisortatiguunngitsumik Nunatsinni pissartanngorniuteqqammerput, Nuummi arfininngornermit ataasinngorneq ilanngullugu ingerlanneqarluni
Sumiissusersiuutigalutik arpannermi pisortatigoortuunngitsumik GM-ertoqarnerani angutit unamminerat naligiiffiuvoq.
Christian Wennecke pissartanngorpoq, Akannguaq Lennert aamma Aqissiaq Mathiassen marluullutik sølvinnattut.
Peqataapput angutit, arnat meeqqallu, Quassussuarmi unammitinneqarlutik. Sapaatiummat pujorpoq, Qinngutsinnilu arpatitsinermi naatsumi unammersuaarnerit naammassineqarlutik.
- Tusaamavarput inuit ilaasa aneerasaartarfimminnit unammisut malinnaaffigisimallugit, aamma unammeqataasunut ilaat ikiuilaarsimanerarput. Ajoraluartumik ataasiarluta naammagittaalliorfigineqarpugut, unammersuaarneq ajoqqusersorfiusoq ataasinngornerup unnukkuani nalunaarfigineqarluta. Naammagittaalliortoqaraangat tamatigut naammagittaalliutigineqartut anguneqarnissaat sulissutiginiapallattarpavut, sumiissusersiuutigalutik Nuummi arpattartut siulittaasuat Christian Wennecke oqarpoq.
Timersoqatigiiffiit tallimat peqataasinnaappata GM-ernerit pisortatigoortinneqalersinnaapput. Sumiissusersiuutigalutik arpattartut peqatigiiffiit Nunatsinni maannamut marluinnaagallarput. Tassaapput Ilulissat orienteering aamma NASP. Sumiissusersiuutigaluni arpannermi pisortatigoortuunngitsumik GM-ernerit Ilulissani arlaleriarluni ingerlanneqartareerput. Siullerpaamik pisortatigoortuunngitsumik Nuummi GM-ertoqarpoq.
- Ilulissanit peqataasoqarnera nuannaarutigaarput. Iluliarmiut peqataasut Nuummi arpaffissat ilisimarpianngimmassuk GM-i unammillernartippaat. Aamma timersoqatigiiffiit apeqqutaatillugit nunap assinganik titartaasoqartarpoq, sungiunniaqqaarsinnaasumik, Christian Wennecke oqarpoq.
Angusat:
Arnat
Kuultinnattoq: Solfrida Larsen
(Arlaqataasut peqataagaluarput, unamminerli naammassinngilaat).
Angutit:
Kuulti: Christian Wennecke
Sølvinnattut: Akannguaq Lennert aamma Aqissiaq Mathiassen
Arnat Nuuk o-fest:
Kuulti: Solfrida Larsen
(Arlaqataasut peqataagaluarput, unamminerli naammassinngilaat)
Angutit Nuuk o-fest:
Kuulti: Akannguaq Lennert
Sølvi: Aqissiaq Mathiassen
Bronze: Jakob Mølgaard
Meeqqat o-fest:
Kuulti: Aka Jensen
Kuulti: Aviaja Kreiner
Sølvi: Kristian Kreiner
Sølvi: Inuk Slettemark
Assit ataani takukkit