assammik arsarneq
Assit takukkit: GOG Finale4-Finale-mut annguppoq
Semifinalimi Århus Håndbold-mut pissanganartumik unamminermi GOG 25-23-mik ajugaavoq
Akiliisinnaajunnaarnermi pinngitsaalisamillu 2. divisionimut appartinneqarnermi kingorna GOG arfininngormat ualikkut pokalinnanniunnermi semifinalimi unammivoq.
Ukiut pingasut matuma siornatigut GOG Århusimi semifinalernermi ajorsarpoq. Ukioq manna ingerlalluarneruvoq.
Unamminermi pissanganartumi ilaanneeriarlunilu sakkortusaqisumi fynimiut sungaartunik tuluujullit finalimut anngupput.
Ataqqinaataasumik pokalinnanniuttarneq aallartinneqaermalli manna tikillugu GOG qulingiluariarluni pokalinnattarsimavoq.
Sapaatiuppat finalimi FC Midtjylland unammissavaat, taamaasillunilu GOG qulissaa pokalinnassinnaavoq.
Angerlarsimaffimminniineq iluaqutigaat
GOG-p sungiusaasua Jakob Larsen siusinnerusukkut Sermitsiaq.AG-mut oqarnikuuvoq pingaaruteqartorujussuusinnaasoq semifinale Odensemi Arena Fyn-imi ingerlanneqassammat. Tamannalu eqquuppoq.
Isiginnaartut ilarpassuit sungaartunik tuluujuqarput. GOG Arenami sulisartorpassuit aamma tassaniipput.
Sekundi siullermiit isiginnaartut 4.000-t amerlanerpaartaasa GOG illersorpaat. Minutsit 30-t marloriarlugit ingerlareersut isiginnaartorpassuit piumasartik pivaat.
Unamminerup ingerlarnga
Unamminermi GOG siulliulluni isertitsivoq. Arhus Håndboldili peqataarusuppoq 3-5-imillu siuarluni.
Unamminerup immikkoortuata siulliup sinnera naligiiffiusorujussuuvoq. 10-10, 12-12, muminnermilu 13-13.
Minutsit 15-it pausereernermi isiginnaartut minnerunngitsumillu unammisartut piareeqqipput.
Isiginnaartut naatsorsuutigaat unammineq pissanganartoq eqqortumik ajugaasoqassasoq, amerlanerpaat neriuutigaat GOG, minnerunngitsumillu unammisut assammik arsarnermik nuannerluinnartumik takutitsissasut.
Isiginnaartut pakatsinngillat.
Immikkoortup aappaani minutsit qulit ingerlareersut GOG målinik marlunnik siuarpoq 20-18-imut.
Jakob Larsenip målmandi taarserpaa. Norskeeq Esben Christensen taarserneqarpoq Frank Mikkelsenimit.
Tamanna silatusaarneruvoq. Frank Mikkelsen annaasseqattaartorujussuuvoq. Unammiffiup illua'tungaani GOG-p isertitsinissaminut nukippassuit atortariaqarpai.
Unamminerulli sinnerani GOG-p siuarsimanini attattuarpaa, Århus Håndbold arlaleriarluni målimik ataasiinnarmik inulerlugit anngutingajattaraluartoq.
Allaammi GOG-p straffe isertinngitsooraluarpaa. Ajornartorsiornerli qaangerneqarpoq, GOG-llu iluatsitsilaarlunilu pikkoreqaluni unammineq aquppaa.
23-22-miit 25-22-mut.
Århus Håndboldip unamminermi isertitaq kingulleq isertippaa, unamminerlu 25-23-mik inerneqarmat GOG-p unammisartui nuannaaqaat pingaarutilerujussuarmik ajugaagamik.
Kalaallit tallimanik isertitsipput
Minik Dahl Høegh sisamanik Akutaaneq Kreutzmannilu ataatsimik isertitsipput. Minik Dahl Høegh unamminerup kingorna eqqortorujussuarmik oqarpoq:
– Ajugaaneq nuanneqaaq. Aqagu suii pitsaanerussaaq.
Frank Mikkelsen tulluartorujussuarmik Man of the Match-itut toqqarneqarpoq.
Aqagu finali
Semifinali alloriarneq siulliuvoq. Aqagu ualikkut unammineq allarluinnaq ingerlanneqassaaq, HC Midtjylland unammissagamikku. HC Midtjylland pokalinnanniunnermi finalimut anngutinngisaannarsimavoq.
Holdip Team Tvis Holstrebromut semifinalimi unamminermini unammisartortaani ilisaritippaa. Tysklandimi nunanut allanut unammisartuusimasoq Pascal Hens HC Midtjyllandimi unammeqqaarnermini iluatsitsivallaanngilaq.
Pascal Hens minutsini quliinnarni unammeqataatinneqarpoq. Semifinalimi unamminermi siullermi HC Midtjyllandip Team Tvis Holstebro 27-25-mik ajugaaffigaa.