assammik arsarneq
Assit takukkit: GOG-p ingerlalluarnini nangippaa
GOG pointinnattuaannalivippoq, maannalu unamminerit arfineq-pingajussaat ingerlatiinnarlugu ajorsanngilaq
Angutini håndboldliga januaarimi Qatar-imi VM-eqarnera pissutigalugu sivisuumik uninngareersimalluni aallarteqqippoq.. GOG-p arfininngormat ualikkut GOG Arena-mi Aalborg unammivaa.
Nammineq unammisarfimmi isiginnaartartut ´nukatsitaasartut´ pisarnertut unamminermik pissanganartorujussuarmik isiginnaartinneqarput, sekundi kingulleq atorlugu aatsaat aalajangiiffigineqartumik.
Kalaallit malunnaatillit
GOG-ermiut kalaallit pingasut, Minik Dahl Høeghip, Akutaaneq Kreutzmannip sungiusaasuunerullu Jakob Larsenip pisarnertut nammineq unammisarfimmi pisut malunniuteqarfigilluarpaat. Unammineq sekundi siullermit pissanganarluinnartumik ingerlavoq.
Unamminermi dommerit suliassaaleqinngillat. Minutsit siulliit arfinillit ingerlariiginnartut pingasoriarluni straffertoqarpoq. Holdit marluk assersuisui tamaviaartorujussuupput. Minutsit 30-t siulliit naligiiffiusorujussuupput, 4-4, 8-8 muminnermilu 10-10-mik inerneqarluni.
Naggataa tikillugu naligeeqisut
Unamminerup immikkoortuata aappaani minutsit siulliit qulit immikkoortumut siullermut assingupput. 14-14-imut ingerlaqatigiipput, tamatumali kingorna GOG ingerlallualeraluarpoq 19-15-imik siuarluni.
Timeout-ernerup kingorna, Aalborgillu tulleriisiinnarlugu arfinilinnik isertitsinerata kingorna GOG ajornartorsiulerpoq 19-21-mik kinguarluni. GOG timeout-erpoq, iluarseeqqinnerillu kingorna pissanganaqisumillu målmandit annaasseqattaarlutik unamminerup naggaserneqarnerata kingorna, unammineq pissusissamisoortorujussuarmik 22-22-mik inerneqarpoq.
GOG-meersoq Mikkel Møller sekundit pingasuinnaat sinneruttut unamminerup inernissaanut isertitsivoq.
Ataatsimik pointinnanneq naammagisimaarpaa
Unamminerup immikkoortuata aappaani GOG målinik sisamanik siuarsimagaluardtoq GOG-rmiut pointimik ataatsimik pissarsinertik naammagisimaarpaat, kingiullermik unammigamik Aalborg-ip fynimiut ajornartorsiortissimaqimmagit.
– Ullumikkut annilaangasimanngilagut, qujanartumillu naligiiginnarnermik angusaqarpugut. Ilami minutsini kingullerni ajorsartitaarujussuarsinnaasimagaluarpugut, Aalborgip sisamanik siuarsimanerput angummagu, Minik Dahl Høegh unamminerup kingorna Sermitsiaq.AG-mut oqarpoq.
Arsaanneq ilanngutilaarlugu
Unamminerup kingorna Jørgen Peter Poulsenip, Kalaallit Nunaanni Arsaattartut Kattuffiat sinnerlugu Jakob Larsen tunissuteqarfigilaarpaa, taassuma futsall-imik nunanut allanut unammisartut juullip siuninngua Danmarkimi Islandimilu sungiusaqatigiimmata oqalugiarfigisimammagit.
Assit ataani takukkit