Nuummi sila
AWG-mi nalinginnaasumik aputeqarnissaanut DMI neriuuteqartitsivoq
Arctic Winter Gamesip aallartinnissaanut ullut 19-iinnanngortut, Nuuk apummik suli amigaateqarpoq. Tamanna pingasunngorpat immaqa allanngussaaq
Nuummi ataasinngornermi ullaap tungaani aputit katersuussimasut ipertuut qulaallugit kissalaartumik anorlernerata, maannamut ukioq manna illoqarfiup silamik ukiorpalaartumik aamma apummik amigaateqarneranut eqqaasitsissutigaa.
Kisianni ullumikkut Danmarks Meteorologiske Institut (DMI), ukiuunerani unammiuaarnissat sioqqullugit allanngortoqarnissaanik ilimasaaruteqarpoq.
Aputiliuutinik pisisimasut
Sermitsiaq.AG-p januaarip 20-ani tamanna ajornartorsiut allaasereqqaarmagu, aaqqissuisut suli ernumavallaalersimanngillat.
Arctic Winter Gamesimi pisortap tullia, Arnakkuluk Jo Kleist, taamani oqarpoq, aputiliuutit marluk annertuumik aaqqisuinerup aallartinnginnerani aaqqiisinnaasut.
Atuaruk: Nuummi 10 C - Ukiumi unammiuaartitsisussat ajornartoornermi pilersaaruteqarput
Ullormut silasiortunit ilimasaarut naapertorlugu pingasunngorpat Nuummi apissaaq, ukiuuneranilu unammiuaarnissanut nutaamik neriuuteqalersitseqqilluni.
Pingasunngorpat allanngoqqissasoq
Taamaattorli uani ukiuunerani silamik ilimasaarutit eqqoqqissaarneq ajorput.
- Pingasunngorpat naqitsiniisaffik kianneranut panerneranullu pissutaasoq, silaannarmik nillertumik aputeqanngitsumillu taarserneqassaaq, DMI.dk taama allappoq.
Nuummi immaqa apeqqissasoq
- Amerikap kangiata sineriaani naqitsiniisaffik sakkortooq pinngoriartorpoq. Kalaallit Nunaata kujataata kitaanut taanna ingerlaarpoq, tamannalu Kujataani apingaatsiarnissaanik isumaqarsinnaavoq, aammalu Nuummi apilaarsinnaalluni.
- Naqitsiniisaffik Islandip Savalimmiullu kujataannut ingerlaqqereeraanga Kujataani sila allanngortarpoq. Naqitsiniisaffiillu arlaqartut nittaalamik nalliuteqattaartut kitaanut Kalaallit Nunaannut ingerlaassapput. Taakkulu immaqa Nuup tungaani nittaalartitsissapput, DMI-mit ilimasaaripput.
DMI-mi atuaruk: Stadig håb om naturlig sne til Arctic Winter Games i Nuuk
DMI atuaqqissaaraanni takuneqarsinnaavoq, nittaalaq pingasunngornermi unnukkut Nuummut apuutissaaq.
Apummik neriuuteqartut
Nuuk Ugeavisip sapaatip-akunnerani kingullermi illoqarfiup ujakkaartarfiani suliaqartut oqaloqatigimmagit, ujakkaartarfik suli kilometerinik marlunnik pingasunnilluunniit takissuseqartoq nalunaarutigineqarpoq, neriuutigineqarporlu ullut 19-it tulliisa ingerlanerini nittaalarumaartoq.
AWG pillugu allaaserisat kingulliit:
AWG-mi arsarluni unammisartussat toqqarneqarput
Maliina Abelsen politikkimut uternianngilaq