Benjamin Kielsen KAK-mi siulittaasunngortoq
Benjamin Kielsen arfininngornermi siulittaasunngorniuttoqarmat John Thorsenimut ajugaavoq.
Kalaallit Arsaattartut Kattuffiat - KAK - sapaatip akunnerata naanerani matumani ataatsimeersuarpoq.
Kattuffik nutaamik siulittaasussarsiortussaavoq, maannamut siulittaasuusoq Finn Meinel ataatsimiinnissaq sioqqullugu sassaqqinniarani nalunaarsimammat.
Siulittaasussatut sassarniarlutik nalunaarsimasut marluusut tassaapput; Benjamin Kielsen Narsameersoq aamma John Thorsen Nuummeersoq.
Benjamin Kielsen siulittaasunngorniunnermi ajugaavoq. Tamanna taassuma Facebookikkut ilisimatitsissutigaa.
44-nik ukiulik Benjamin Kielsen Narsameersuuvoq, maannamullu KAK-p siulersuisuini ilaasortaalluni.
- Ilaatigut futsalimi nunanut allanut unammisartutta nunarsuarmi pissartanngorniuttoqarnerani peqataasarnissaasa aqqutissiuunneqarnissaannut piareersimavunga. Unammisartuvut ukiuni kingullerni ineriartorsimaqaat, taamaammat pissusissamisuuginnarpoq unammisartutta nunarsuarmi pissartanngorniuttoqarneranut peqataasalernissaat anguniarlugu KAK-mi sulissuteqarnissarput, Benjamin Kielsen ataatsimeersuartoqarnissaa sioqqullugu Sermitsiaq.AG-mut oqarpoq.