Faxe Cup'imut peqataaniarluni SAK katersivoq
FAXE CUP – SAK'p arnartaanit kajumigineqartoq
Timersoqatigiiffiup SAK'p assammik arsartartui arnat Nuummi Faxe Cup ingerlanneqartussaq peqataaffigerusuppaat. Unammiuaarnerup peqataaffiginissaa pissangalluni qilanaarineqarpoq.
Kisianni peqataaneq angalanerlu akisoqaat. Taamaattumik timersoqatigiiffik peqataaniaruni 45.000 koruuninik katersisariaqarpoq.
Arfininngorneq oktobarip aallaqqaataani SAK arnartaasa Sisimiuni Katersortarfik tiguarpaat tuniniaallutik kaffisorniarfimmillu ingerlatsillutik.
Ulloq aallarnerlugu nerriviit tuniniaavissat inissitsiterneqarput, inuit illoqarfimmeersut nerriviit ullormut 200 koruunilerlugit attartorsinnaasaat, namminneq assigiinngitsunik tuniniaavittut atorsinnaallugit.
SAK namminneq kaffisorniartarfimmik kaffinik, tiinik imeruersaatinillu allanik tuniniaaffigisaminnik soorlu kaagit, suppit tamulugassallu allat aamma tassani pisiarineqarsinnaasut.
Arfininngornermi kingusinnerusukkut meeqqat inuusuttuaqqallu qititsinneqarput, suli kingusinnerusukkut inuttuaqqat utoqqaanerit inersimasullu qititsinneqarlutik, tuniniaanermik kaffisorniartarfimmillu aaqqissuisoq Dorthe Olsen, aamma SAK'p arnartaasa siulittaasorisaat oqaluttuarpoq.