Faxe Kondi Cup aallartilluartoq
GSS ammaanersiorluni unamminermi NÛK ajugaaffigaat - islandimiut FH illoqarfimmiut toqqakkat ajugaaffigigaat
Assammik arsarneq pingasunngornermi unnukkut allartilluarpoq - arnat Faxe Kondi Cup'iat ukiunik 20'nngortorsiorluni nalliuttorsiorneranut atatillugu unammiuaartitsineq unamminernik marlunnik aallartinneqarmat. Ammaanersiorluni unammineq siorna Nunatsinni pissartunngortut GSS aamma bronzinnattut NÛK akornanni ingerlanneqarpoq.
GSS unammiuaarnermi aallartilluarpoq aallaqqaataaniilli siuarlutik. Unamminerup aallartinnerani minuttit 30't ingerlareersut ajugaasussat paasinarsereerput, GSS 17 - 8'mik siuaqqammata.
Unamminerup immikkoortuata aappaani NÛK sukappoq - NÛK immikkoortumi tassani iluatsitsilluni 16-15'imik ajugaammat. Kisianni minuttit 60'it tamakkermata GSS pitsaaneruvoq - 32-24'mik ajugaanerat naapertuulluni. Panu Grønvold, GSS'imi isaatitsinerpaajuvoq arfineq-pingasunik isertitsigami, taakku immikkoortup aappaani tamaasa isertippai. Lykke Frank Hansen arfineq-marlunnik isertitsivoq. Karen Marie Kyed Meyer, NÛK arfineq-pingasunik isertitsivoq.
FH islandimiut pitsassuit
Unamminerup aappaani Nuummiut arnartaat toqqakkat - sinerissamit Danmarkimeersunillu ilallit - islandimilu 1. divisionini arsartartut FH Reykjavik'imeersut arsarput. Unammineq taanna nuannerluinnarpoq illoqarfimmiut tupaallatitsillutik.
Islandimiut aallartilluarnerpaajupput erniinnarlu siuarlutik. Kisianni illoqarfimmiut arsarnerat pitsanngoriartorpoq, taakkua ulluinnarni sungiusaqatigiinneq ajoramik qanorlu arpariaaseqarnerminnik imminnut nalugamik, sungiukkiartuleriaramik arsariaasiat ataqatigiikkiartulerpoq. nikinnermi FH 18-12'imik siuaqqavoq.
Unamminerup immikkoortuata aappaani FH siuarsimajuarsinnarpoq, illoqarfimmiut naakkinarsileraluarlutilli tassanngaannaq isaatitsillutik aallartipput. Ajorsarujussuarnissaagaluaq pinaveersinneqarpoq unamminerli naammassineqarpoq 26-37. Illoqarfimmiut isertitseriartartuisa pitsaanersaraat Linda Lyberth, SAK, taanna arfineq-pingasoriarluni ajuuppoq. FH'mi isaatitsinerpaajuvoq Steinunn Snorradottir arfineq-pingasunik isertitsisoq Hind Hannesdottir aamma Sigrún Jóhannsdottir, tamarmik tallimaraartut.
Unnummut - sisamanngornermi - illoqarfimmiut NÛK'mut nal. 19.00 unammissapput, pissangagisat GSS aamma FH nal. 20.40 miss. unammissallutik. Nuna tamakkerlugu arnat sungiusaasuat Jakob Andreasen Nunatsinnit sisamanngornermi tikissaaq - NÛK'p sungiusaasuisa issiavianniissalluni.
Unammiuaarnermi angusat isertitsisullu ataani takukkit.