dansk håndbold
Inaarutaasumik unamminerit Akutaaneq Kreutzmannip aqqunarsimagami peqataaffiginngitsoorsinnaavai
Ligami unamminermi kingullermi Kalaallit Nunaanni assammik arsaalluni nunanut allanut unammisartoq Akutaaneq Kreutzmann, aqqunarpoq. Aqqunarsimaneratali inaarutaasumik unammeqattaarnissamut peqataatinngitsoorsinnaavaa.
Ligami unamminerit kingulliit pingasunngornerup unnukkuani ingerlanneqarput.
Holdit arfineq pingasut immikkoortunut marlunnut avinneqarsimapput taakkuli semifinalinut anngunniutissallutik. Pingasunngormalli unamminerit naammassineqarmata paasinarsivoq kikkut ingerlaqqissanersut. Inissisimanerit aalajagissavaat kikkut naapissanersut. Ajoraluartumilli Ribe Esbjerg HH Bjerringbro-Silkeborgillu unammineranni nunanut allanut unammisartoq Akutaaneq Kreutzmann aqqunarpoq.
Ligami unamminerni kingullermi Ribe Esbjerg HH Bjerringbro-Silkeborgimut 18-27-mik ajorsarujussuarpoq. Akutaaneq Kreutzmann unamminermi ataaseraarluni isertitsivoq. Unamminerup naammassinissaanut minutsit 15-niinnganngortullu ajoraluartumik Akutaaneq Kreutzmannip unammisani Sebastian Skube aporlugu kulluni saamerleq ajoquserpaa.
- Assaga gipsimik poortoqqavoq naluarali qanoq ajortiginersoq. Naggussama noqarutai qanoq innersut apeqqutaapput, Akutaaneq Kreutzmann, Sermitsiaq.AG-mut oqaluttuarpoq nangillunilu:
- Suliaritissanngikkuma ullut qulit qaangiuppata qerattaqquteqarlunga iluamillu poortorluarneqarsimappat unammeqqissinnaassaanga.
- Aatsaalli imminut illersorsinnaappat unammeqataasinnaavgunga taanna qularnanngilaq. Unammiaarpallaarumami aqqunarsimanera ajornerulerseriaannaavara, Akutaaneq Kreutzmann naggasiivoq.
Minik Dahl Høegh klubbia Århus Håndbold ajoraluartumik ingerlaqqinngitsoorput. Århus Håndboldip angusarissaarluni sæsoni naammassivaa. Isiginnaariat 3140-rujut akonanni inaarutaasumik unammeqataasut Skjern Håndbold 37-33-mik ajorsartippaat.
GOG suli unammilluaqattaarpoq
Pingasunngormat GOG Arenami, GOG-ip HC Midtjylland 28-21-mik ajugaaffigaa unamminerup affaata naammassinerani 16-11-mik siuaqqasimallutik. Frank Mikkelseni unamminermi immikkoortuani siullermi minutsit 12-it qaangiummata fynimiut isertitsissuppai. Unamminerup aallartinneranit minutsit 15-it siulliit kisimik pissaganarsimapput Frank Mikkelsenimi arsarluaqigami isertitseriarnerpassuillu annaattaqattaarsimallugit. Naak Jakob Larsenip unammisartuutini pitsaanerit sipaaraluarai unamminermi qularutigineqarsimanngilaq kikkut marlunnik pointinnassanersut.
Taamaasilluni Frank Mikkelseni Sapaatip Akunnerani Holditsialattut toqqagaanini qulakkeerpaa. Inissisimaffinni arsarluarnerpaat Sapaatip Akunnerata Holdianut ivertinneqartarput.
Tamarmik imminut ajugaaffigisinnaasut
Immikkoortut sakkortussusaat apeqqutaanngilaq. Inaarutaasumimmi unamminissat tamarmik pikkunarnissaat ilimanareerpoq. Danmarkimi assammik arsaannermik isiginnaariartartut qilanaalereersinnaapput. Unammisarfinni ulikkaaqqasuni pissagasoqarumaarpoq.
- Aalborg Håndbold, Skjern Håndbold og KIF Kolding København unamminissaat iluarisimaarpara, GOG-ip sungiusaasua Jakob Larsen, neriuuteqarluni oqarpoq.
- Holdit tamarmik pikkoripput. Unamminerit tamarmik qanoq ingerlajumaarnerat aalajangeeqataassaaq soorunalimi aamma semifinalimut ingerlaqqissagutta iluatitsisariaqarpugut.