Ivigaasanik arsaattarfissamut meeqqat suleqataasut
Ilulissani ivigaasanik arsaattarfeqalissaaq kingusinnerpaamik juunip naanerani
Meeqqat inersimasullu timersortartut tapersersortaallu 60-it missaanniittut aputaajaajartornissamik N-48-ip Facebookiani kajumissaarut naapertorlugu aputaajaaqataajartorlutik ornigussimapput.
Tassami Ilulissani ivigaasanik arsaattarfeqalissaat, arsaattarfillu juunip naanerani atoqqaarfissiorneqassasoq kommunimit naatsorsuutigineqarpoq.
- Ilaasortanut kajumissaarut ersarissimavoq: Timersortartutut sumi inissisimaneq apeqqutaatinnagu sulisoqassaaq. Taamaasillutillu kajumissutsiminnik nivakkiaqataasut eqimattanut agguarneqarsimapput, meeqqat, angajoqqaat utoqqasaallu arfininngornermi aputaajaapput, massa angutit, arnat inuusuttullu sapaammi aputaajaasimasut, kommuni allappoq.
N-48-mi ilaasortat allatut nukkassarlutik siullermiilinngillat. Siornatigut aasalernerani sioqqanik aqqusinermi katersisarsimapput, eqqagassanik katersilutik aammalu ataasiaannaratik utoqqarnik utoqqaat illuanneersunik aneerussisarmapput.