KAK: Matoorivallaarnasi
Sumiiffinni assigiinngitsuni tuniluuttoqarsinnaaneranik aarlerinartoqanngimmat matoorivallaartoqannginnissaa Kalaallit Arsaattartut Kattuffiata kaammattuutigaa. Angutit ukioq manna isikkamik arsaallutik unammersuarnissaat KAK-p qulakkeerusuppaa.
Angutit isikkamik arsaanermi unammersuarnissaanut anngunniunnerit nukappiaqqallu U15-mi Maniitsumi unammersuarnissaraluat sapaatip akunnera ingerlanerani pisussaagaluarput. Sisimiuni kujataanilu coronavirusumik tuniluuttoqaratarsinnaanera pissutaallutik pisortat sukangasunik maleruaqqusanik nuna tamakkerlugu atuutsitsilerput. Oqartussat maanna inissisimaffik nalilersorneqaqqittariaqartoq KAK innersuussuteqarpoq. Taakkumi isumaqarput kujataa minillugu tuniluuneq aqunneqarsinnaalersoq.
- Nuummi tunillatsittoqarsimatillugu unammisitsisinnaasarnikuuvugut. Maannalu kisitsisit qiviaraannni sineriammi tuniluuneq aqunneqarsinnaarpasippoq, KAK-mi siulittaasoq, Finn Meinel Sermitsiaq.AG-mut oqarpoq.
Maannamut Ilulissani ataaseq, Nuummi Ataaseq, Sisimiuni arfinillit Kommune Kujallermilu qulit tunillatsissimapput. Kommune Qeqertalimmilu tunillatsittoqarsimanani. Tunillatsissimasut kisitsisai uani takusinnaavatit.
Anngunniunnerit naammassineqartariaqarput
Unammersuarnerit KAK-imiit ukioq manna taamaatsinneqarusunngillat. Isikkamik arsaanermimi unammersuarnerit ukioq kingulleq taamaatsinneqarput. Unammersuarnerit taamaatsinneqassanngippata anngunniunnerit naammassineqarnissaat pingaaruteqarluinnartut Finn Meinel naqissusiivoq.
- Unammersuarnerit unitsinneqassanngippata anngunniunnerit pingaaruteqartorujussuupput. Taamaammat neriuutigaarput unammisitsinerup nalaani tuniluutsitsinaveersaaqqataasarnerput Naalakkersuisut aamma maluginiassagaat, Finn Meinel oqarpoq nangillunilu:
- Isumaqarpunga isikkamik arsaattartut tuniluuttoqannginnissaanut sillimaniartarnerat naammagisimaarnartorujussuusoq. Fut-salimi unammersuarnermi maleruaqqusat sakkortuut atuutsinneqarput aamma silami unammisarnerni. Neriuutigaarput tamakkua oqartussaniit maluginiarneqartassasut. Akisussaaffimmik annertuumik tamatta tigusiniarsarisarpugut, Finn Meinel oqarpoq.
Unammersuarnerit taamaatsinneqarnissaat ukioq manna KAK-ip ernumassutigaa. Unammersuarnerimmi isikkamik arsaattartunut kajumerilersitsisarpoq innuttaasullu illoqarfinni susoqarnera aamma qiimmassaatigisarlugu, siulittaasoq paasissutissiivoq. Oqartussat kujataata avataani inissisimaneq maluginiartariaqaleraat, Finn Meinel naqissusiivoq.
Maleruaqqusat maanna atuutsinneqartut ataasinngorneq juulip 19-ata tungaanut atuutsinneqarput.