Kalaallit Nunaat Ringsted-imi ajugaapput
Kalaallit unammisartut ilaat unammeqataasinnaanngikkaluartut kalaallit angutitaat Ringsted-imi arsarluaqaat. Ajugaallutillu
Kalaallit nunanut allanut unamisartui unammeqataasinnaanngitsortaqaraluarlutik marlunngormat arsarluaqalutik 29 - 28-mik 1. division-imi unammisartut TMS Ringsted ajugaaffigaat, nikinnermi TMS Ringsted 13 -12-imik siuaqqangaluartut.
Sungiusarluareernermik ajugaanermillu kingorna sungiusaasup Niels Møller-ip ulloq Ringsted-imi unamminertik iluarisimaarlugu eqqaavaa.
-Panamerikamiut Brasilami pissartanngorniunnissaannut angusariaqakkagut marluk naammaginartumik anguagut. Juunimi Faaborg-imi katersuuppugut maannakkullu Slagelse-mi... Unammisartut arlallit unammeqataasinnaajunnaaraluartut, TMS Ringsted-imi arsaattartut sapaatip akunerata naanerani ajorsarnikuugamik ajugaarusukkaluaqisut unamivagut. Unammisartutta inuusuttaat arsaalluaqaat takutitsilluarlutillu. Faaborg-imilu unammigatta naligiiginnarnikuugatta sungiusaasutut suli ajugaaffigineqanngilanga.
Nunanut allanut unammisartut sungiusaasuata Niels Møller-ip Minik Dahl Høegh siuttutut inissinnini iluartumik naammassilluarmagu nersualaarpaa. HC Fyn-imi tunuarsimasuulluni unammeqataasartoq sakkortoqisumik miloriussisartoq isertitseqattaaginnalernikoq 16-eriarluni isertitsivoq. Unamminerni kingullerni pingasuni taanna 34-eriarluni isertitsivoq.
29-eriarluni isertitsinerit unammisartunit ukunannga isertinneqarput
Minik Dahl Høegh 16
Miki Johnsen 5
Aqqaluk Ingemann 2
Finn Frederiksen 2
Muussa Søholm 2
Miki Rosing 1
Rasmus Larsen 1
Brasiliamut unammiartunnginnerminni unammisartut Kalaallit Nunaanni najugallit oktobarip 15-ianni 16-iannilu Nuummi katerisimaassapput.
Sungiusaasoq Niels Møller ulapaartussanngorpoq. Sungiusaasut pikkorissartinneqartussaapput. Oktobarip 13-ianni aamma 14-ianni Ilulissani kiisalu oktobarip 15-ianni Nuummi. Kingusinnerusukkullu aamma Qaqortumi.
Novembarip 5-ianni aamma 6-anni unammisartut Nunatsinni najugallit Danmarkimi unammisartuulernikunik ilallugit Nuummi sungiusartinneqassapput.
Unammiartoqataasussat novembarip qiteqqunnerani toqqartorneqarnissaat Niels Møller-ip naatsorsuutigaa.