arsaattarfiit ivigaasalersukkat
Maniitsoq angisuumik ivigaasaarartalimmik arsaattarfittaassaaq
Sapaatip-akunnerata siuliani Qeqqata Kommuniani kommunalbestyrelsip aalajangerpaat, Maniitsumi FIFA-p akuerisaanik ivigaaraasartalersukkamik arsaattarfittaartoqassasoq.
Maniitsoq FIFA-p akuerisaanik tassa 65 gange 106 meterimik angissusilimmik ivigaaraasalersukkamik arsaattarfittaassaaq, massakkut arsaattarfiusoq allineqassalluni. Tamanna Qeqqata Kommuniani kommunalbestyrelsip sisamangormat aalajangerpaa.
Maniitsumi arsaattarfiup allilerneqarnissa akisugalugu Qeqqata Kommuniani kommunalbestyrelsip amerlanerussuteqartut borgmester Malik Berthelsenilu tapersiisimanngikkaluarput.
- Innutaasut aningaasataasa aqunneqarnissanut akisussaaaffeqaraani, Kommunalbestyrelsemi ilaasortaasugut arlallit isumaqarsimavugut, aningaasat taama amerlatigisut arsaattarfinaarmut atorneqarnissaat ingasappallaartoq, Malik Berthelsen sapaatip-akunnerata siuliani KNR-imut oqarpoq.
Allakkat pingaarutillit
KNR-ilu naapertorlugu, kommunalbestyrelsi isikkamik arsaattartut kattuffianni KAK-miit allakkamik tigusaqarsimapput, tassani isikkamik arsaattarfiup FIFA-p akuerisaanik nunanut allanut unamminernut atorsinnaanissaa innersuussutigineqarluni. Taamatullu innersuussuteqarneq kommunalbestyrelsip aalajangiinissaanut pingaaaruteqarluinnarsimavoq.
Borgmester Malik Berthelsen KNR-imi Nunatta Nipaanut oqaatigaa, ukiup tulliani piareersartoqalissasoq, arsaattarfillu ivigaaraasalersugaq 2019-imi naammassineqarnissaa naatsorsuutigineqarpoq.
Arsaattarfiup eqqaaniittut qaqqat qaartitsineqassapput, qaartitserinermilu ujaqqat Maniitsup umiarsualiviata allilerneqarneranut atorneqarsinnaasut, kommunalbestyrelsi isumaqarpoq. Ivigaaraasalersukkamik arsaattarfissarsuaq kommunip 13 million koruunit missarluinnaani aningaasartuutigissavaa.