N-48 aamma B-67 pointit marluuppaat
Inuusuttut isikkamik arsarlutik nunatsinni pissartanngorniuneranni marlungnornermi unamminerit marluk naligiipput.
Marlunngormat ualikkut Qasigiannguani nunatsinni inuusuttut angutitaasa pissartanngorniunnerani B-67 Nuummeersoq Nagdlúnguamut (N-48) unammivoq. Unammineq 1-1-mik inerneqarpoq.
– B-67 unammilluarnerugaluarpoq isertitsinissaminut periarfissaqarnerulluni. Arsalerillaqqipput unammeqatigiilluarnerullutik, Nagdlúnguami sungiusaasoq Ole Brønlund Sermitsiaq.ag-mut oqarpoq.
Nagdlúnguak 1-0-mik siuarpoq B-67-ilu unamminerup naalernerani naligiilersitsivoq.
– Qanoq periarfissaqarnersoq oqaatigiuminaappoq. Unammiuaarnerilli ingerlanerini unamminerni pingaarutilinni B-67 immaqa unammeqqissinnaavarput, Ole Brønlund oqarpoq.
Qeqertasuarmiut Kugsak UB-83-imut Upernavimmeersumut ajugaagamik uteqqipput, 4-1-imik ajugaalutik. Kugssak unamminerit aallartinneranni pakatsinartumik aallartipput B-67-imut 0-7-imik ajorsaramik.
ALLAASERISAQ ATUARUK: B-67 ajugaarujussuarpoq
FC Malamuk Uummannameersoq Eqaluk 54-imut Tasiusameersumut 2-2-mik unammivoq.
Marlunngornermi angusat:
B-67 - Nagdlúnguak 1-1
Kugsak - UB-83 4-1
FC Malamuk - Eqaluk 54 2-2