Nunanut allanut unammisartut nittartagartaartut
Kalaallit sisoraatinik oqilaniullutik nunanut allanut unammisartui nittartagartaarsimapput soqutigisallit malinnaalluaqqullugit
Kalaallit sisoraatinik oqilaniullutik nunanut allanut unammisartui nittartagartaarsimapput.
Taanna taaguuteqarpoq www.skiteam.gl.
- René Design ikiortigalugu nittartakkamik pilersitsivugut. Nittartakkamik aallartitsinitsinnut tunuliaqutaavoq nunanut allanut unammisartut nittartagaq iluaqqutigalugu nukittorsarneqarnissaat anguniaratsigu, nunanut allanut unammisartunik sungiusaasoq Erik Amondsen oqarpoq.
- Eqqarsaatersuutigineqarpoq nunanut allanut unammisartut nutaarsiassanik ikkussivigisassagaat nunani allani sungiusaraangamik imaluunniit unammeqataagaangamik.
- Aamma nunanut allanut unammisartut mail’inik allaffigineqarsinnaapput. Tamakkua saniatigut uanga suliakka nittartakkamut saqqummiuttassavakka – toqqorsivimmut – taamaaliornikkut isumassarsiakka ukiut ingerlaneranni malinnaavigineqarsinnaapput, aamma siunissami nuna sinnerlugu unammisartunngorumaartussat takusinnaaniassammatigit nunanut allanut unammisartunut qanoq suleriaaseqarsimanersunga, Erik Amondsen oqarpoq.