Pissartanngorniunneq inuulluarit
HC Fyn tallimanngornermi HC Midtjyllandimut ajorsarput
Jakob Larsenip arsartartui timersortarfimmut anginngitsumut 500 miss. isiginnaariartulimmut Herningip silataani Hammerumimi isaassut unammineq kingulleq GOG'mut arsarluarnertik ingerlateqqinngilaat. Fynimiut namminneq arsartarfiginngisaminnit arfinilissaa ajorsarlutik angerlamut aallarput. Jyllandip qeqqaneersut unammineq 27 - 26'mik ajugaapput.
HC Fyn aallartilluarpoq. Pingasunik siuarsimalluni 3 - 6. HC Midtjylland sukappoq tulleriiginnarnik tallimariarluni isertitsilluni. Nikinnermi unammiartorfiit 11 -10-mik siuaqqapput. Unamminerup immikkoortuata aappaani minutsit 20-t siulliit uteqattaaginnavipput. Fynimiut marlunnik anisitaasoqarput, HC Midtjyllandip Jens Fredsgaardertaat arsarluaqaaq, saassussipallattarnermigut unamminerup minutsii qulit kingulliit ajugaanissartik qulakkeerlugu. HC Midtjylland 27 - 26'mik ajugaapput, ukioq ataaseq 1. divisionimi arsartooqqinnissartik qulakkeerlugu.
Minik Dahl Høegh arfineq-marlunnik isertitsilluni HC Fynimi isaatitsinerpaajuvoq. Jakob Larsen marlunnik isertitsivoq.
HC Midtjylland kalaallinit ilaatigut akusaapput. Troels Aagaard, jyllandip qeqqaneersut pitsaanersaannut ilaavoq kalaallinit qingoqqisuuvut. Troels Aagaardip aanaa Uummannamit aggerfeqarmat.
Ukiualuit matuma siorna Troels Aagaard Kalaallit Nunanut allanut Unammisartuinut peqataatsiarpoq sungiusaqatigiinnerit marluk peqataaffigigamigit. Sermitsiaq.AG'p Hammerumimi unammminerup kingorna Troels Aagaard oqaloqatigitsiarpaa.
- Suli ajuasuutigisarpara annermik peqataatinneqannginnera. Piffissap ilaa iluatsissallugu neriuutigisarpara, ukiut marluk karantænigaareernerma kingorna arsaqataasinnaanngussasoralunga. Taamaattoqarnissaali ilimanarunnaarpoq. Uannut ilaquttannullu pingaaruteqartorujussuusagaluarpoq Kalaallit Nunaat sinnerlugu unammeqataasinnaasuuguma.
Pitsaanerpaanut ilanngunnissaq HC Fynimut qularnarsiartorpoq, HC Fynimut ajornartorujussuuvoq normu 4-tut inissisimaannarnissaq unamminissaq ataasiinnaq amigaatigigalugu Håndboldligamut pisinnaagunanngimmata.