Podcasti nutaaq: Timersornermi misigisat saqqummiunneqartassapput
Timersorneq pillugu podcastimi 'Aqqutaani'-mi tusarnaagassiaq siulleq tusaaneqarsinnaalereerpoq
NÛK-mi assammik arsarnermi unammisartoq Muusaarannguaq Ostermann-Søholm aamma sulorarnermi nunanut allanut unammisartoq Sequssuna Fleischer Schmidt podcasti 'Aqqutaani' pilersippaat, tassani timersorneq sammineqartassalluni.
- Immikkoortuni tamani pulaartoqartassaagut, timersornerup iluani misigisaqarsimasut oqaluttuartinneqartassallutik. Timersornerup tungaatigut tusarneqarsimanngitsut tusartinneqarnissaat pingaartillugu una sanavarput, Muusaarannguaq Ostermann-Søholm Sermitsiaq.AG-mut oqarpoq.
Taassuma podcastinik tusarnaarneq soqutigisaraa, soorlu 'Duften af Harpiks' aamma 'Her går det godt' tusarnaartarlugit.
Oqaluttuat nuannersut
- Pissartanngorniunnerni pisortassuaqartarpoq, angusaqarsimanermi suut aqqutit atorneqarsimanersut oqaluttuarineqartassapput, assersuutigalugu soorlu sungiusarnerit, unamminartut, nuannersut oqaluttuarineqartassallutik. Pisut tunuini susoqarsimanersoq paasissallugu soqutiginassaqaaq, oqaluttuarpoq.
Nunatsinni timersuutini assigiinngitsuni timersortartut tamakkerneqarnissaat oqaatigaa.
- Nunamut allamut unammiartornermi misigisimasat tusarnaartut tusaassallugu qilanaarissavaat, soorunami aamma Nunatsinni pissartanngorniunnernit pisartut oqaluttuarineqartassapput. Pisut nuannersorpassuit tusarnikuunngikkigut qularnanngilaq, taamaattumik oqaluttuat suli oqaluttuarineqarsimanngitsut tusaanissaat qilanaarnarpoq, Muusaarannguaq Ostermann-Søholm oqarpoq.
'Aqqutaani'-mi aallakaatitaq siulleq tusarnaaruk