Sulorarneq: Iligiiaarluni VM-eqataasussat toqqarneqarput
Nunanut allanut unammisartunut sungiusaasup Rune Svenningsenip VM-eqataasussat toqqarpai
Sulorarnermi iligiiaarluni nunarsuarmi pissartanngorniunnissamut kalaallit peqataasussat nunanut allanut unammisartut sungiusaasuata Rune Svenningsenip toqqaqqammerpai.
Angutit pingasut aamma arnat pingasut toqqagaapput, taakku Kina-mi nunarsuarmi pissartanngorniunnermi peqataassapput.
Angutini toqqagaasuupput Frederik Elsner, Jens-Frederik Nielsen aamma Toke Ketwa-Driefer, arnani toqqarneqarput Milka Brønlund, Nina Høegh Møller kiisalu Sara Lindskov Jacobsen.
Kalaallit Nunaat takutinneqassaaq
- Toqqagaanera pissangagereerlugu toqqagaanera paasigakku nuannaaqaanga. Ukioq kingulleq EM-imi peqataavunga, kisianni maanna VM-eqataalernerput ukioq kingullermit misigisassatut anginerusutut naatsorsuutigaara. Kina-liarnissaq pissanganaqaaq, Nina Høegh Møller Sermitsiaq.AG-mut oqarpoq.
25-nik ukiulik sulorartartoq piffissami sivitsortumi sakkortuumik sungiusarpoq. VM-imi unamminerni ajugaaqataanissani neriuutigaa.
- Kisianni nalunngilara unammillerneqartussaalluta, tassami unammisartut pitsaasut unammisussaavagut. Aamma Nunarput nunarsuarmioqatitsinnut takutittussaavarput, tamanna unammillernassaaq, kisianni aamma qilanaarnaqaaq, Nina Høegh Møller oqarpoq.
Unamminerit ineriartuutaasut
Iligiaarluni VM-eqataanissaq Jens-Frederik Nielsenimut sulorarnerup tungaatigut misigisassaq annersaajussaaq.
- Unammisaqattaarnissatsinnut pissangavunga, kisianni aamma qilanaartorujussuullunga. Ukioq kingulleq EM-eqataanitsinnit unamminernik amerlanerusunik ajugaanissarput neriuutigaara. Unammisassatsinni Kenyamiut ilisimasaqarfiginngilluinnarpakka. Kasakhstanermiut nalunngisaqarfigilaarpagut, Macau-ermiunullu ajugaasinnaanissarput naatsorsuutiginngilluinnarpara, oqarpoq.
- Ukiup aappaa avillugu ineriartupiloornikuuvunga, tassani nunanut allanut unammiartoqattaarnerput peqqutaalluarpoq. Angalasarnivut ineriartuutaalluartarput, aamma VM-eqataanissarput qanorluunniit assigiinngitsutigut ilikkagaqarfigissavarput. Sulorartartut kattuffiat ukiut kingulliit annertuumik suliaqarnerat Nunatsinnut iluaqutaalluassaaq, tassami unammisartut amerliartornerat malugaarput, Jens-Frederik Nielsen oqarpoq.
Nunanut allanut unammisartut atisassaannut Li-Ning aningaasaliipput, nunarsuarmilu iligiiaarluni pissartanngorniunneq ingerlanneqassaaq maajip 19-anit 26-ata tungaanut.