arsaanneq
Sungiusaasoq: Nordic Cup-imit ilikkagaqarluarpugut
- Unammisaqattaarnerup ingerlalluartugut ersersippaa, illup iluani isikkamik arsaannermi lanstræneri oqarpoq. Iligiit januarimi ajugaanniunnissamut aamma qaaqqusaapput
Illup iluani isikkammik arsarluni nunanut allanut unammisartugut Nordic Cupimi, Finlandip, Danmarkip, Norgep Nunattalu peqataaffigisaanni ajugaanniutereerlutik angerlamut apuuteqqammerput.
Unamminerit Sverigemi ingerlanneqarmata Nunatsinneersut arsaqattaarnerup piareernissaata tungaannut peqataapput.
Peqataaneq ilinniuarfiusimasoq landstræneri Tekle Ghebrelul Sermitsiaq.AG-mut oqarpoq.
Atuaruk: Torrak! Futsalertartut Nordic Cupimi Norgemut ajugaasut
Unammisat misigitsaatsut
- Immitsinnut ilikkarneroqaagut. Unammisagut aaqqissuulluakkamik anguniagaqarlutillu sukataarput. Misigitsaapput, kukkulaaruttami arsamik isertitsipallattaramik.
Nunatsinnillu nunanut allanut unammisartut pitsanngoriartuinnarnissai ilimagilluinnarpaa.
Nunanit allanit nersorneqarput
- Unammisatsinnit nersorneqartorujussuugatta ajunngitsumik ingerlasugut nalunanngilaq. Misilittakkalliuku amigaatigigivut. Taamatullu ingerlaannassagutta angusaqarluarsinnaakutsoorpugut, Tekle Ghebrelul erseqqissaavoq.
Unammisaqattaarnerni ullut tulleriit sisamat peqataapput. Unammisartunilu tamanna malugineqarsinnaavoq.
- Unammisuni kisiartaalluta ajugaasussat tungaanut ingerlaannarpugut. Unamminerilluni ingerlaneri sukkaanneq pipput taamaattoqarneratalu unammisartugut qasutippai. Unamminerit kingulliit marluk qasullutik unammigamik ajorsarput, landstræneri oqaluttuarpoq.
Atuaruk: Sungiusaasoq tipaatsuttoq: Isumaqatigiissut periarfissarpassuarnik pilersitsivoq
Ajugaanniunnissamut qaaqqusaapput
Finlandip landstrænneria Kroatiameersup nunatsinnit unammisartut januarimi ajugaanniunnerit nunanit tamalaanit sisamanit peqataaffigineqartussamut qaaqquai.
- Eqqumaffigilluarneqalersimanerput qaaqqusaanitta takutippaa. Norgep suleqatigerusuppaatigut unammeqqikkusullutalu. Sverigemi arsaattartut kattuffiani præsidentip arsaattartugut aamma nersualaarpai, neriuutigalugulu ineriartornertik ingerlatiinnassagaat. Ingerlariaqqinnissatsinnut pitsanngorsarnissatsinnullu tamakku nukissanitsitsipput, Tekle Ghebrelul oqarpoq.
Pilliutit amerlasuut
Unammisartut Sverigemi peqataanngitsut arlallit holdimut peqataaqqilernissai neriuutigaa.
- Arsaattartut pingasuunngikkunik sisamat landholdimiinnissaminnut tulluaraluarput. Træneqataasarnissaminnullu piumassuseerussimallutik. Ulluinnarnimi trænertorujussuuvugut amerlasuunillu pilliuteqartariaqartarluta. Neriuppungalu (atinik eqqaasaqarani aaqq.) arsaqataasartut uteqqissasut, angusaqangaatsiarsinnaagaluarattami, Tekle Ghebrerul oqarpoq.