Timersullammak

Kalaallit Nunaanni Timersoqatigiit Kattuffiata aamma Sermitsiaq ullumi Ukioq manna timersullammammik toqqaavoq. Assammik arsartartoq Karen Marie Kyed Meyer, timersoqatigiiffimmi NÛK'mi arsartartoq ukiorpassuarni nunatta unammisartuinut ilaanikuuvoq.

GIF'ip siulittaasuata Nuka Kleemannip sooq ukioq manna Karen Marie Kyed Meyer toqqarneqarnersoq tunngavilersorpaa, pimoorussilluni anguniaqartuullunilu timersortartoq ukiuni tamaginni nunatsinni arnat arsartartut pitsaanerpaat ilaanniittuaannarmat.

- Nunatsinnit arnat assammik arsarlutik unammisartuanni ilaasussatut toqqarneqaqqaaramili ilaajuaannarpoq, Nuka Kleemann ilaatigut taama oqarpoq.

- Sungiusarnissaminut tunuarsimaarnani siulliuartuuvoq, ukiui eqqarsaatigalugit ukiup unammiffiusup allaqqaataannit naaneranut pimoorussiuartoq ingerlatsiuarluni. Timersuutini pimoorullugu aalluttarpaa anguniagaqarluni, tamannalu tunngavigalugu unamminerni tamatigungajak målernerpaat ilagiunarlugu aammalu ukiup holdiani ilaajuaanarluni, GIF'ip siulittaasua oqarpoq.

- Karen Marie Kyed Meyer meeraanerminiilli timersorneq ingerlappaa, pimoorussilluni anguniaqartuullunilu timersortartuuvoq. Ukioq manna assammik arsarlutik Politilandsholdinut peqataavoq, Politi håndbold nunarsuaq tamakkerlugu unammersuarneranni. Pikkorissuuvoq meeqqanut inuusuttuaqqanut sutigut tamatigut maligassiuilluni, Nuka Kleemann oqarpoq, taassuma nuannaarutigaa Ukioq 2011 Karen Marie Kyed Meyer timersullammattut toqqarneqarmat.

Nersornaasigaanerup saniatigut Sermitsiamit aamma timersoqatigiinnit checki katillugu 10.000 koruuninik imalik kiisalu 8.000 koruunit Air Greenlandimit tunniunneqarput.

Ukiut aappassaa nunatsinni timersullammattut arnaq toqqagaavoq. 2010'mi sisorartartoq Niviaq Chemnitz Berthelsen toqqarneqarpoq.