Timmisartoq angumeriniarlugu qamuteralattut: Aqqutaani nangiarpugut
Volleyballertartut niviarsiaqqat marluk qamuteralannik Qasigiannguanit Aasiannukaramik aqqulluttukkoorput. Qujanartumik timmisartoq angumeraat, Arctic Winter Gamesimullu Canadamut peqataajartorlutik aallarput
Niviarsiaqqat marluk volleyballertartut, 14-inik ukiulik Ajaaja Jeremiassen aamma 16-inik ukiulik Tupaarnaq Z. Lundblad Qasigiannguaneersut, sisamanngormat 150 kilometerisut isornartutigisukkut illoqarfimminnit Aasiannukaramik angalanerat ulorianartortaqaqaaq. Qulimiguulik ilaaffissaat taamaatinneqarmat,
Ajaaja Jeremiasenip aatakkuinik qamuteralannik ingerlanneqarnissaat angajoqqaavisa aalajangiussimaavaat. Qamuteralannik ingerlasimanngitsuugunik Arctic Winter Gamesimut peqataanngitsoorsimassagaluarput.
Atuaruk: Timersortartut 150 kilomterimut qamuteralattariaqartut
Ersernerluttoq aamma aqqulluttoq
- Ingerlaarnitsinni nangiarpugut, ersernerlullunilu aqqulluppoq. Akunnerit pingasut missaani sivisussusilimmik ingerlaarpugut, nunaqarfimmilu Ikamiuni uninngallatsiarpugut, Ajaaja Jeremiassen aamma Tupaarnaq Z. Lundblad oqaluttuarput.
Aasianni unnueriarlutik Kangerlussuarmut ingerlaqqipput, tassanngaanniillu Canadamut.
- Nuannersumik misigisaqassaagut, angusaqarluarnissarpullu neriuutigaarput. Immaqa pissartanngussaagut, volleyballertartut qungujullutik oqarput.