Champions League
Tusaamasat CL-mi isaatitsilluartut
Lionel Messi, Neymar aamma Kylian Mbappé Champions Leaguep aallartinneqarnerani malunnaateqarput,Paris Saint-Germain, Barcelona aamma Manchester United qularutissaanngitsumik ajugaapput.
Lionel Messi, Neymar, Kylian Mbappé, Edinson Cavani aamma Romelu Lukaku.
Champions Leaguep aallartinneqarnerani tusaamasarsuit aasaaneranilu niuerutigineqartut annersaasa ilaat arsarluarput.
Angusarissaarussuttut Paris Saint-Germainikkut aallaqqaataaniillu naqissuserpaat, aasaanerani alutornartunik pisiortornermikkut upernaaru pissartanngorniuteqataarusullutik.
Nunarsuarmi iskkamik arsaattartuni akisunerpaaq, Neymar, Monacomilu pisiarineqarsimasoq Kylian Mbappé aamma Edinson Cavani pingasuullutik parisermiunut pingasuullutik ulorianarluinnarlutik saassussisartuupput.
Taakku pingasut tamarmik isertitsipput - Cavani marloraarluni - Skotlandiminngaanneersut Celtic arsaattarfiani 5-0-mik ajugaanermi.
Tamatuma kingorna arsaanneq Neymarip iluarisimaarluinnarpaa.
- Nuannaaqaanga. Unammineq nuanneqaaq, unammisartoqatikka sinnerlugit nuannaaqaanga. Ajugaaneq pingaaruteqarpoq, Neymar Uefap nittartagaanut oqarpoq.
18-iinnarnillu ukiulik Mbappé aamma nersualaarpaa.
- Arsaatillaqqissut arsaqatigalugit nuanneqaaq, aamma inuusutsillugit. Uanga isinni arsallaqqissupilussuuvoq, sulilu pitsaanerulersinnaalluni, brasiliamiu nersualaarinnilluni oqarpoq.
Neymarip Barcelonami unammeqatigisarsimasaa Lionel Messe pisarnermisuut Champions Leaguemi arsarluaqaaq, Camp Nou-imimi Juventus 3-0-mik ajugaaffigaat.
CL-imi finalertuusimasut isiginnaartuinnanngorlugit Messi marlunnik isertitaqarpoq isertitarineqartullu pingajuannut pilersitseqataalluni.
Marlunngornermi ammaanersiortoqarnerani Manchester Unitedikkut aamma peqataaqqilerput, taakkut sæson kingullermi peqataanngillat, Europa Leaguemilul pissartanngorput.
United Old Traffordimi Basel 3-0-mik ajugaaffigaat, Romelu Lukaku ilaatigut isertitsisoralugu, taanna sæsonip aallartinnginnerani Evertonimit pisiarineqarsimavoq.
Unitedillu pissartanngornissaa eqqartorneqartillugu, sungiusaasoq José Mourinho tamatumunnga silatusaaqqusivoq.
- Pissartanngornissamut periarfissaginnersaanngilagut.
- Champions Leaguemi pissartanngussagutta unamminerit 13-it unammissutigisariaqarpagut, massakkullu siullermeerluta unammeqqammerluta. Unammisartoqatigiit nutaat pilersinniarsaraagut, anguniangarpulli ungasippoq.
- Europami unammisartut sisamat tallimalluunniit uagutsinniit pitsaanerupput, Mourinho TV3+imut oqarpoq unammisartullu
FC Barcelona, Bayern München, PSG, Real Madrid aamma Juventus eqqaallugit.
Mourinhop siornatigut unammisartut ilimagineqanngitsut qanoq angusaqartissinnaanerlugit takutereersimavaa.
- Porto aamma Inter Champions Leaguemi pissartanngortinnikuuakka, taakkuli tamarmik ilimagineqarsimanngillat, sooq taama pisoqassannginnami? Paasinarsissaaq, Mourinho oqarpoq.
Ilimagineqartut arsaanneranni Chelsea Qarabag 6-0-mik ajugaaffigerujussuarpaat, Bayern Münchenilu Anderlechtimut 3-0-mik ajugaallutik.
/ritzau/