Assammik arsarluni VM
Wilbek: Maanna ajugaaasariaqalerpugut
Danmark Polenimut ajorsassaguni VM-imut aqqutissaa imaannaanngitsuunavianngilaq, Ulrik Wilbek isumaqarpoq
Dansk Håndbold Forbund-imi (DHF) timersornermut pisortap Ulrik Wilbek-ip nuannaarutigaa Qatar-imi VM-eqarnerani Danmark 1/8-finalimut anngummat.
Aamma Wilbekip takusinnaagaluarlugu Danmark finalimut anngunnissaminut ajornannginnerusumik aqquteqarsinnaasoq isumaqarpoq Polen-imut ajugaaniarnissaq tamaviaarulluinnartariaqartoq.
– Isumaqarpunga ajugaanissaq maanna pisariaqartikkipput. Tassami pisariaqarpoq. Taamaassappat arsarnerat pitsaanerujartuinnartariaqarpoq. Taava ingerlaqqinniulluni unamminerni immitsinnut upperinerulissaagut, Wilbek oqarpoq.
Gruppi C-mi Ilimagineqartut Frankrigip Sverige ajugaaffigissappagu taava Danmark Polenimut ajorsaruni Gruppi D-mi normu 3-tut finalimut anngunnissaminut ajornannginnerusumik aqqutissaqassaaq.
Qallunaat normu 3-ngorunik qularnanngitsumik kvartfinalimi Kroatia, semifinalimilu Tyskland unammisinnaavaat.
Qallunaat normu 2-ngussagaluarunik finalimut anngunniarnissaminnut tamaviaarnerussapput - qularnanngitsumik kvartfinalimi Spania, semifinalimilu Frankrig unammisinnaallugit.
Wilbek-ip ilimaginngilaa Sverigep Frankrig ajugaaffigisinnaassagaa. Svenskimmi kakkattortarsuat Kim Andersson ajoqusersimalluni ilaasinnaanngilaq.
– Kim Andersson ajoqusersimavoq, svenskinilu peqataanngippat oqaannassaanga ajugaasinnaanissaannut procenterpassuit peerussimasut, Wilbek naliliivoq.
Danmarkip suli anguniagaraa minnerpaamik semifinalimut anngunnissani, taamaattumillu 1/8-finaliminngarnit angusaqarnerujussuussapput.
– Danmarkimi anguniagaqallaqissuuvugut, tamatigullu siuttunut ilaarusuttarluta. Taamaattumik ingerlaqqissinnaasariaqarpugut.
– Aammattaarli nalunngilarput 1/8-finalimi unammineq ajornakusuussasoq, taamaattumik tamatigut anguniaqagaqartoqaannartassaaq, Wilbek oqarpoq.