Aalborgimiit toqqaannartumik timmisartoq siulleq sisamanngornermi tikittoq

Ruby Rejserip Air Greenlandillu Aalborgip Nuullu akornanni timmisartuussineq nutaaq sisamanngornermi ullaakkut ammarpaat, timmisartuussineq qallunaat timmisartortitseqatigiiffiannit Airsevenimit Boeing 737-800-mik 189-inik ilaasoqarsinnaasumik ingerlanneqartussaavoq

Timmisartuusseqqaarnermi, angalasunik makiaarlutik qallunaat nalunaaqutaat naapertorlugu nal. 6.25 angalanissamut akunnerit marluk sioqqullugit Aalborgip timmisartoqarfianeereersimasunik qasusunillu ilaasoqartumi, inissat tamakkerneqarsimapput.

Ullaaralaajugaluartorli Aalborgip mittarfiani aallariartortarfimmi nuannaartoqarpoq.

Pisortaaneq nuannaartoq

Angalatitsiviup Ruby Rejserip pisortaa Morten Meyer nuannaarnerugunarpoq. Angalatitsivik Ruby Rejser timmisartuussiffimmik aallarniisuuvoq, tassani Jyllandip avannaata Kalaallit Nunaatalu illoqarfiisa pingaarnersaata akornanni bilitsit akikinnerit 1998 koruuneqarput.

- Tuniniaaneq iluatsilluarpoq - aappaagulu tuniniaaqqikkumaarluta ullumikkut neriorsuisinnaavunga, Morten Meyer, Ruby Rejserimeersoq, oqarpoq.

- Ullumikkut ilaasut 30 procentiisa missaat eqimatanngorlutik angalaqatigiipput, taakkualu Kalaallit Nunaannut akunnittarfimmi unnuisussanngorlugit misigisassarpassuaqartillugillu angallappagut. Ilaasut sinneri nalinginnaasumik timmisartumik angalasuugamik Aalborgimiit Nuummut toqqaannarlugu ajornanngitsumik angalaneq kissaatigisimavaat.

Timmisartup Boeing 737-800-p Airsevenimeersup, aqqummi atorneqartup, nassiussanut ineqarfia ulikkaarmat Morten Meyerip aamma nuannaarutigaa. Arctic Import avannamut timmisartuussinerni nassiussanik 50 procentinik isumaginnittuuvoq.

Billetsit akikitsut

Timmisartuussiffik siorna aggustimi Ruby Rejserimit aallartinneqarsimasoq, siumuinnarlu angalanermi 1998,- koruuninik akeqartinneqartoq, soqutigineqartorujussuuvoq.

Tamatuma nalaani Air Greenland aamma Nuummiit Aalborgimut toqqaannartumik timmisartuussinissamik pilersaaruteqarpoq, timmisartuutileqatigiiffiillu taakku marluk akornanni codeshare naapertorlugu suleqatigiilerput.

Timmisartuusseqqaarneq sioqqullugu unammillernartoqarpoq, tassami nassataminnik tunniussiniarlutik utaqqisut amerlaqimmata.

- Atortorissaarutitigut unammillernartoqarpugut, Air Greenlandimi piujuartitsinermut attaveqaqatigiinnermullu pisortaq Inga Dora Gudmundsdottir Markussen nassuiaavoq.

- Naatsumik oqaatigalugu AirSevenip atortorissaarutaata Aalborgip mittarfiani atortorissaarutinut attaveqartinniarnerani ajornartorsiuteqarpugut. Ullulli arlaqanngitsut ingerlaneranni aaqqissavarput.

Kalaallit Nunaannut timmisartuusseqqaarnissaq sioqqullugu ilaasussat kaffillerfigineqarlutillu croissantinik sassaalliiffigineqarput. Soorunami aamma qalersamik aappalaartumik qiorsisoqarpoq.