Air Greenland 2024-mi annikitsumik sinneqartooruteqartoq
Air Greenlandip ukiumi qaangiuttumi angusaanut kisitsisit siulliit saqqummiunneqarput. Angusat naammagisimaarnarput, Air Greenland nammineq isumaqarpoq.
Kalaallit Nunaanni timmisartuussinermut qitiusumik ingerlatsivik Kangerlussuarmiit Nuummut nuunneqarmat 2024 Air Greenlandimut ukiuuvoq pingaarutilik. Pisortaq Jacob Nitter Sørensen Københavnimiit aqqut ammaanersiorneqarmat uani takuneqarsinnaavoq.
Assi: Morten Okkels
Air Greenlandip 2024-mut naatsorsuutai akileraarutit suli ilanngaatiginagit 60,8 million koruuniupput. Ukiup siuliani 84,5 million koruuniusimasuniit annikinnerupput.
Kaaviiaartitat aningaasartuutillu amerlisimasut Air Greenland nalunaarpoq. Akileraarutit ilanngaatiginagit kaaviiaartitat 2023-mi 1,78 milliard koruuniusimasut taamaalillutik 2024-mi 1,86 milliard koruuniupput.
Siulersuisuni siulittaasup Malik Hegelund Olsenip pisortaanerullu Jacob Nitter Sørensenip ukiumut angusat siulersuisut 2025-mi marsip 26-ani ataatsimiinneranni saqqummiuppaat.
– Sulisut piffissami allanngorarfiungaartumi suliassarujussuaq suliarisimavaat, tunniusimalluinnarlutillu suliaminnut pikkorilluinnarsimapput,“ siulersuisuni siulittaasoq Malik Hegelund Olsen oqarpoq.
Air Greenlandip ukiumut aningaasartuutit ilaat tusagassiuutinut nalunaarummi nammineq eqqaavai. Sila pissutigalugu unammillernartut Nuummilu Atlantiku qulaallugu timmisartuussinermi mittarfittaap pilersinneqarnera pissutigalugit pilersaarutaanngitsunut aningaasartuutit 100 millionit koruunit sinnerpaat.
Air Greenland aammattaaq ilisimatitsivoq:
– 2024-mi 275,0 million koruuninik taarsigassarsisitsisoqarpoq, 2024-milu 175 million koruunit atorneqarput 2025-milu taarsigassarsisitsisoqaqqissasoq naatsorsuutigineqarpoq.
– Air Greenland 2024-mi 357,3 million koruuninik sanaartornermut aningaasaliivoq, qulimiguullillu H125-it kingulliit tigunerisigut timmisartut nutarterneqarnerat maanna naammassivoq.
Naatsorsuutit tamarmiusut Sermitsiamit takuneqarsinnaasimanngillat. Naatsorsuutit maajip 19-ani ataatsimeersuarnissap aallartinnissaa sapaatip-akunneri marluk sioqqullugu maajip tallimaani tamanut saqqummiunneqassapput, Air Greenland allappoq.
