– Ajornartorsiungaatsiarpugut

– Ilumoorpoq, Kangerlussuarmut ukioq takornariartitsiniarnerput ajornakusooqaaq.

Lings Hunting Greenlandimik piginneqataasoq suliffeqarfinni taakkunani aamma pisortaasoq Karsten Lings oqarpoq.

Aappariit Lingsikkut piniarnermik ukiuni 40-ni milisittagaqartuusut, tassa Karsten nulialu Hanne akiliisitsillutik piniartitsisarfimmik Lings Hunting Greenlandimik ingerlatsisuullutillu piginnittuupput, aamma qitornaat Lukas Vivilu suliffeqarfimmi tassani tamarmik immikkut suliaqartarnikkut ingerlatseqataapput.

Suliffeqarfik taanna marsip aallaqqaataata apriilillu qulingata akornanni akiliisitsillutik piniartitsisarpoq.

– Takornariat ulluni marlunni-pingasuni apuunniartariaqartarnerat pissutaalluni Kangerlussuarmut takornariartitsiniarneq ajornakusoorpoq, Karsten Lings oqarpoq.

Soqutiginnittut ilaasa akunnittarfinni unnuisaqattaartariaqartarnerit angalanissamullu billetsit akii uumitsaatigisarpaat, taanna ilisimatitsivoq.

Nittarsaassinerlunneq

Akileeqatigiingaatsiarlutik marsip 13-ani umimmanniarniarlutik takornarialersaaraluarsimasorpaat assersuutitut taassuma taavai. Takornarialersaaraluarsimasut taakkua Nuummut tikittussaagaluarput, timmisartorsuarli ilaaffigisaat missinnaasimanngimmat Danmarkimut utiinnartariaqarsimapput. Timmisartumi aqaguani Nuummukartussami inissaqarsimanngimmata, Kangerlussuarmut marsip 16-iani tikitsinnatik Nuummi marsip 15-iani unnueqqaartariaqartussanngorsimapput. Akileeqatigiingaatsiarlutik takornarialersaaraluarsimasorpaani arfiniliusuni tallimat angalanertik taamaatiinnarmassuk tiknngitsuuinnarsimapput.

– Tamanna Kalaallit Nunaannik minnerunngitsumillu suliffeqarfiutitsinnik nittarsaassinerlulluinnarneruvoq, Karsten Lings oqarpoq.

Timmisartorsuaq Nuummut missinnaanngikkaangat Kangerlussuarmukarnani Danmarkimut utiinnartariaqarajunnera Kangerlussuarmiut ilarpassuisa tupigusuutigaat. Tamanna Air Greenlandip Københavnimiit Kangerlussuarmut marsip 17-aniit sapaatip akunneranut marloriarluni toqqaannartumik timmisartuussisalerneranik kinguneqarpoq. Tamatuma kingorna takornariartitsinikkut ajornakusooqqinnatillu sullitaminnit aarlaannaatigulluunniit maalaaruteqarfigineqaqqissimanatik, Karsten Lings oqarpoq nangillunilu: 

– Kangerlussuarmulli toqqaannartumik timmisartuussisarnerit oktobarip naanerani unitsinneqarnissaat ajoraluartumik pilersaarutaavoq. Kangerlussuarmulli toqqaannartumik timmisartuussinerit ingerlaannassasut ukioq kaajallallugulu taamaaliortoqartalissasoq, taassuma neriuutigaa.

Timmisartuutileqatigiiffiup Jettimep Kangerlussuarmut toqqaannartumik timmisartuussisarnera nuannaarutigeqigitsik, Kangerlussuarmi akiliisitsillutik piniartitsisartut allat ilisimatitsipput. Taakkua akiliisitsillutik piniartitsinissatik Jettimep timmisartuussinissaat aallaavigalugit pilersaarusiortalersimavaat.

- Sullitavut tamarmik Nuukkooqqaartariaqarsimagaluarunik sullitarisimagunavianngikkaluarpagut, akiliisitsilluni piniartitsisartoq kiunermik isertuusserusuttoq oqarpoq. Taannali kiunersoq Sermitsiamit ilisimaneqarpoq.