Amerikamiut Nunatsinnukarusupput

Elise Bruunip USA-mi misigisai naapertorlugit Kalaallit Nunaat takornarianit soqutigineqartorujussuuvoq. Nunatut alutornangaartutut isigaat. Ilaasali amerikamiut Kalaallit Nunaanni eqqissiviilliortitsisut isumaqaramik tikeraarnissartik kinguartissimagaat, angalatitsisut nittarsaassineranni Adventure Elevatemit Denverimiit angerlarami Sermitsiamut oqarpoq.

Akisussaaffik kommuuniniittoq

New Yorkimiilli timmisartuussisarnerup nutaap atuutilernerata kingorna USA-mit takornariat aasaanerani amerlanerulernissaat ilimagaa.

 - Kalaallit Nunaannut tikinnissaat ajornannginnerulerpoq, oqarpoq nangillunilu:

 - Puiussanngilarpulli Islandikkoorlutik periarfissaqartuaannarsimanerat, aamma amerikamiorpassuit aqqut taanna aqqutigalugu Kalaallit Nunaannut tikeraartarput.

Elise Bruunili mianersoqqusilluni kommunit akunnittarfimmik sanaartornissamut akuersissummik pissarsinissamut akisussaafferujussuaqartut, taamaalillutik Kalaallit Nunaat takornariarpassuarnik tikittoqarsinnaalerlutik tikkuarpaa.

- Allaannginnami Nuummi mittarfiliortoqarnera kommunip tupaallaatigigaa, oqarpoq.

 Piffissaq sivisusinnaasoq

 Elise Bruunip Denverimi misigisani pillugit isumaqatigiissutit aalajangersimasut eqqartunngilaa.

- Peqataasut suleqatigiillutik Kalaallit Nunaat nittarsaappaat, oqarpoq.

 Elise Bruun Amerikami niuertut ataatsimeeqatigereerlugit Kalaallit Nunaanni ukiuni aggersuni pisussanik pilersaarutitut siunnersuutinik nassiussissasoq isumaqatigiissutigineqarpoq.

 - Taamaattumik ukiup ataatsip marlulluunniit qaangiunneranni aatsaat pisoqalersinnaavoq, oqarpoq.

 Tamarmik assigiinngitsunik kissaateqarput, amerlasuullu Kalaallit Nunaat pillugu ilisimasaqanngilluinnarput. Ilaat avannaaniittut, ilaat kujataaniipput, ilaasalu suut tamaasa soqutigisarpaat.

 - Tikeraartut nuannernerpaamik misigisaqartinniarlugit tamatta immikkut iliuuseqartariaqartugut qularutissaanngilaq, Elise Bruun oqarpoq.

 Misigisassarsiorfik

Amerikamiut atugassanik allaanerulluinnartunik sungiusimasaqartut Elise Bruunip aamma eqqaasitsissutigaa. Taamaattumik Denveriminnermini piffissarujussuaq atorlugu Kalaallit Nunaannut angalaneq allaanerulluinnartoq nassuiaqattaarpaa.

 – Kalaallit Nunaannut angalaneq nuannertaqaaq. Akunnittarfimmi akimasumiiginnarani kalaallit qanimut naapissinnaallugit. Kalaallit Nunaat attartugassaananilu akimasuumik misigisassaanngilaq. Misigisassarsiorfiuvoq, tassanilu inuit qanimut attaveqarfigineqarsinnaallutik. Tamanna Kalaallit Nunaata immikkuullarissusianut pissutaavoq, Elise Bruun oqarpoq.

 Sila allanngorartoq

Elise Bruunilli silap allanngoriasaartarnera takornariaqarnermut ajoqutaasinnaasoq aamma mianersoqqussutigaa.

 - Silap allanngorarnera ilaasa tunuarsimaarnerannik kinguneqartarpoq, allalli unammilligassatut isigisinnaavaat. Tassunga atatillugu paasissutissiinerullutalu kiffartuussinerput pitsanngorsartariaqarparput, Elise Bruun oqarpoq, nangipporlu:

 - Tamanna Travel By Heartimi pingaartigaarparput. Sullitatta toqqissisimanissaat anguniarlugu ulloq unnuarlu piareersimasarpugut, taakkumi angalanissaanni allanngortoqaraluarpat kiffartuunneqarnissaminnik piareersimaffigineqarnertik toqqissisimassutigissavaat.

 Timmisartut piffissaq eqqorlugu missinnaanngikkaangata imaluunniit aallarsinnaanngikkaangata unammilligassanik malitseqartartoq Elise Bruun oqarpoq. Taama pisoqaraangat angalasut naammagittaalliortarput, sumimi unnuissanerlutik angalanissamullu pilersaarutinut allannguutit pillugit sivisuumik paasitinneqarnissartik utaqqisariaqartaramikkit.

 Travel by Heart Indiamiit tikeraartoqaqqammerpoq, taakkualu timmisartuussinerup taamaatiinnarneqarnera paasiuminaatsissimaqaat Kangerlussuarmukarnissartillu taamaatiinnarsimallugu.

 - Tamanna uggornarpoq, unammilligassalli piutillugit utertiinnarnissaat aaqqiissutissatut pitsaanerpaasarpoq, kingusinnerusukkullu tikeqqinnissaat neriuutigiinnartariaqarlugu, Elise Bruun oqarpoq.