Aqerluusassaq Amitsumeersoq nunani allani misissuiffinnut nassiunneqartoq

Poorsuit 30-35-t qeqertamit Amitsumeersunik aqerluusassanik imallit, Qaqortumi umiarsualivimmiipput. Tuluit aatsitassarsiortitseqatigiiffiat GreenRoc Strategic Materials saffiugassiassamik nassitsisuuvoq, poorsuillu Royal Arctic Linep assartuutaannik nunani allani misissuisarfinni misissugassanngorlugit nassiunneqassallutik.

- Aqerluusassaq saffiugassiassaq aasaanerani piiagarput misissuisarfinnut assigiinngitsunut nassiussuunneqartussaagami, taamaalilluta aqerluusassaq qanoq ililluta pitsaanerpaamik piiarsinnaaneripput paasiniassagatsigu, GreenRoc Strategic Materials-imi pisortaq Stefan Bernstein oqarpoq.

Misissuinerit ingerlatseqatigiiffiup imminut akilersinnaasumik piiaasinnaanerminut misissuineranut ilaassapput. Taamaattumik suliniut ineriartortinniarlugu alloriarneq tamanna siulliusoq, Stefan Bernstein oqarpoq, tikkuarlugulu ingerlatseqatigiiffiup aqerluusassamik tunisassiornermik aallartitsinissaa suli ungasittoq. – Ineriartortitsilluta siunissami sivisunerusumik suliniarpugut. Aamma piiaanissamut akuersissummik qinnuteqaatitta Namminersorlutik Oqartussanit suliarineqarnissaa utaqqivarput, Stefan Bernstein oqarpoq, taassuma EU-kommissæri Dan Jørgensen qanittukkut ataatsimeeqatigaa, tamannalu pilluni Amitsumi suliniutigineqartup EU-Kommissionip aatsitassanut suliniutaasa pingaarnerit ilaattut toqqarneqarneranut atatillugu, tamannami EU-mut aatsitassanik pingaarutilinnik pitsaanerusumik pilersuinermik qulakkeerinnissaaq.

 Pingaarutilimmik aatsitassarsiornermut suliniut

Pingaarutilimmik aatsitassarsiornermut suliniummik ingerlataqartutut toqqagaaneq isumaqanngilaq EU-mi atorfillit maannakkut Amitsumi aatsitassarsiornermik suliniummik ingerlatsilissasut. Aamma imaanngilaq EU suliniummut aalajangersimasumut maannakkorpiaq aningaasaleeqataassasoq.

GreenRoc-illi pingaarutilimmik pilersaarutilittut EU-mit toqqagaanerata kingorna aningaasaliisinnaasunut suliffeqarfinnullu aqerluusassiamik piserusussinnaasunut attaveqarsinnaalissaaq. Tamannalu siunissami ungasinnerusumi pingaaruteqarluinnalersinnaalluni, tamannami pitsaassutsimik naqissuserneqarnertut ikkami. GreenRoc Strategic Materialsip suliniutaani Amitsumi piiaaffimmik pilersitsinerup saniatigut, Norgemi aqerluusassamik suliarinnittarfimmik pilersitsisoqassaaq.

Aqerluusassamik piiaaffik tamakkiisumik ingerlanneqalerpat, piiaaffiup ukiumut 400.000 tonsit missaanniittunik piiaasinnaanissaa naatsorsuutigineqarpoq. Taakkunannga aqerluusassaq akuitsoq 80.000 tonsit missaannik annertussuseqassaaq.