Avannaata Kommunia Siku-Blockinik atuilerusuttoq

Kalaallit Nunaanni maanna qarmasissiortutuaq Siku-Block, ukiut qulikkaat marluk sinnerlugit qineqqusaarutigineqartuartartoq pillugu imaqanngitsumik politikikkut oqaloruusaarneq unittussanngulerpoq.

Avannaata Kommuniani borgmesteri Lars Erik Gabrielsen, Siumut, maanna nammineq suliniuteqarluni Jakob F. Knudsenimik, Kalaallit Nunaanni sanaartornermi atortussiap oqallisaanerpaamik, mannali tikillugu atorneqarnanilu sanaartornermik ingerlatsisunit tiguneqanngitsumik isumassarsisumik ataatsimeeqateqarpoq. Ataatsimiinneq sapaatit akunnerani kingullermi Ilulissani ingerlanneqartoq illuatungeriinnut, siunissami qaninnerpaami Kalaallit Nunaanni illunik qarmasissianik sanaartornermik kiisami aallartitsinissamik isumallualersitsisoq, Jens Napãtôᴋ', Naleqqameersoq, borgmesterimut siullertut tullersorti, borgmesterillu sanaartornissamut takorluugaanik tapersersuilluinnartoq oqarpoq.

Periarfissat misissorneqassapput 

Borgmesteri Lars Erik Gabrielsen, nammineerluni sanasutit ilinniarsimasoq aamma sanaartornermik ingerlatsinermik annertuumik ilisimasaqartup, Narsami qarmasissiorfimmik Siku-Blockimik suleqateqarnissamut periarfissanik misissuinissaq kissaatigaa, taannalu manna tikillugu kujataani illunik qarmasissianik sanaanik arlalialunnguanik taamaallaat sanasimavoq.

Ukiut arlallit kingulliit ingerlaneranni Jakob F. Knudsen qarmasissiat pitsaassusaannik periarfissaannillu politikikkut aalajangiisartunik iluatsinngitsumik paasititsiniaasarsimagaluarpoq, taannalu naapertorlugu qarmasissiat niuerfimmi unammillerluarsinnaasorujussuupput. Borgmesterimik ataatsimeeqateqarnermini Jakob F. Knudsenip ilaatigut qarmasissiap oqummik saassunneqartannginnera, aserfallatsaalineqartariaqannginnera, taamaammallu aningaasaqarnikkut aningaasaliinissamut qularnaatsumik periarfissaanera erseqqissaatigaa.

Avannaata Kommuniata tusagassiorfinnut nalunaarutaani, inissiat kalaallit qarmasissiaataannik sanaartukkat qisunnik illulianut sanilliullutik ingerlatsinermi akikinnerunerat, flisinillu illoqarfinni nunaqarfinnilu – ingammik avannaani – aqqusinernik pitsannguinerni atorneqarsinnaasunik sanaartortoqarsinnaanera oqaatigineqarpoq.

“Ineqarnerup tungaatigut Nunarput aserfallatsaaliuinissap nutarterinissallu annertoorujussuit maanna saavanniippoq. Kalaallit qarmasissiaat atoraanni najukkami suliffissat qulakkeerneqaannassanngillat atortussanillu tikisitsineq annikillineqaannassanngilaq, aammali Nunatsinni aningaasaliinerit piujuartitsinermik tunngaveqartut pilersinneqarsinnaapput”, ilaatigut Avannaata Kommunia, Siku-Blockimik suleqatigiinnissamik isumaqatigiissuteqarnissamik kissaateqartoq allappoq.

Siunissamut neriulluartoq 

Borgmesterip Lars Erik Gabrielsenip kommunalbestyrelsillu qinnuiginninnerat malillugu, Jakob F. Knudsen Narsameersoq Siku-Blockimik taassumalu periarfissanik saqqummiivoq, naallu illuatungeriit suli sukumiisumik isumaqatigiissuteqanngikkaluartut, kommuni suleqatigiinnissamut annertuumik soqutiginnittoq, taanna erseqqissaavoq. Taanna naapertorlugu Siku-Blockimik tunisassiaq Danmarkimi Teknologisk Institutimit akuerisaavoq, taamaammallu sumiluunniit tunisassiorfimmik akuerisamik pilersitsisoqarsinnaalluni.

- Suleqatigiinnissamik isumaqatigiissusiorutta pilertortumik Ilulissani tunisassiorfimmik pilersitsisinnaavugut, tassanilu qarmasissianik amerlasoorsuarnik sanaartorneq siunissami qaninnermi aallartinneqarsinnaavoq.

- Qarmasissiat sioqqanik naqitanik sanaajupput piffissallu sivikitsup ingerlanerani amerlasoorsuanngorlugit tunisassiarineqarsinnaapput, taanna oqarpoq.

Ukiut ingerlaneranni Narsarsuarmi illu ataaseq Narsamilu katillugit illut pingasut sanasimavai.

- Narsami nammineq illora 2023-mi inaasarpara. Uanga illut pitsaassusaat nalilissanngilara, qarmasissianillu illuliama ukiuni 30-ni kingullerni annertunerusumik iluarsaattariaqarsimannginnerat, ukiukkullu issimut naleqqulluartuunerat oqaatigisinnaavara, taanna oqarpoq.

Siku-Blockip ukiorpassuarni qineqqusaarutigiuarneqarsimanera, taamaattoq tunisassioriaatsip atorneqannginnera, Jakob F. Knudsenip tikkuarpaa. Peqatigisaanik Avannaata Kommunianik siunnerfeqarluartumik ataatsimeeqateqareerluni siunissamut neriulluarnerulernini erseqqissarpaa.

Avammut nioqqutigineqarsinnaasoq 

Avannaata Kommuniani borgmesterimut tullersorti siulleq Inatsisartunullu ilaasortaq Jens Napãtôᴋ' sapaatit akunnerani kingullermi Siku-Blockimik piginnittumik ataatsimeeqateqarnermi peqataavoq.

- Qarmasissianik illuliornermi atorneqartussanik tunisassiornermik aallartitsinissaq siunertaralugu kommunip Siku-Blockimik suleqatigiinnissamik isumaqatigiissusiornissaanut kommunalbestyrelsimut qinnuiginninnissaanik borgmesteri kaammattorpara.

- Siku-Block tapersersortuarsimavara, maannalu kalaallit qarmasissiaannik avammut tunineqarsinnaanerannut aamma periarfissaqartunik tunisassiornermik aallartitsinissamik periarfissaqalerpugut, taanna oqarpoq.

Maajimi Jens Napãtôᴋ' Naalakkersuisunut § 37 naapertorlugu apeqquteqarluni Siku-Blockit atorlugit illulioqataasoqarsinnaaneranut periarfissaqarnersoq aperivoq, tassungalu Ineqarnermut Naalakkersuisoq Aqqaluaq B. Egede, Inuit Ataqatigiit akissummini illulioqataanermut taarsigassarsisarneq pillugu Inatsisartut inatsisaa eqaatsuusoq, qinnuteqartullu aallaavittut namminneerlutik illumik qanoq ittumik sanarusunnerlutik toqqaasinnaasut akivoq.