CO2-mik toqqorsivissamik piukkunnartussarsiorluni Nipisat qeqertaasaani qillerineq

Inuussutissarsiornermut, Aatsitassanut, Nukissiuuteqarnermut, Inatsisinik atortitsinermut Naligiissitaanermullu Naalakkersuisoqarfimmi ujarassiuunut immikkoortortami sulisut aggustimi septembarimilu qeqertaasami Nipisani Qeqertarsuup kujataata kitaaniittumi, nunaqarfiup Kangerluup ungasinngisaaniittumi qillerisimapput.

CO2-mik toqqorsinissamut periarfissatut piukkunnaateqartut

Qaqqap innermik anitsisartuusimasup sananeqaataannik misissuinissaq qillerinermi siunertaavoq, tamannalu Naalakkersuisut Nunatsinni CO2-mik toqqorsiviusinnaasunik misissuinissamut periusissiaannut ilaalluni. Naalakkersuisoqarfiup ujarassiornermut immikkoortortaqarfia Sermitsiamut taama ilisimatitsivoq.

– Marloriarluni qillerisoqarpoq, sananeqaatinillu misissugassanik tigusisoqarluni. Misissugassat nunarsuup sananeqaataani qalliusunik misissuinerit tunngavigalugit misissorneqassapput, ujaqqallu sananeqaataasa allaaserineqarnissaannut atorneqassallutik. Qillerinerit naammassimmata qaarsut sananeqaataasa qanoq innerat paasiniarlugit qillerinerit nalunaarsorneqarput naqitsinermillu misilittarneqarlutik. Qilleriffigineqartut matuneqannginnerini qilleriviup aappaani kiassutsimut misissuutinik ikkussisoqarpoq, taannalu qilleriffigineqartumi tamarmi kiassutsimik uuttortaasassalluni. Malussarniummit paasissutissat tamarmik kikkunnit tamanit atorneqarsinnaapput, assersuutigalugu nunamik qeriuaannartumik imaluunniit nunap iluata kissassusianik allanik misissuinermut, aatsitassanut Naalakkersuisoqarfimmi ujarassiornermut immikkoortortaqarfimmit taama oqartoqarpoq.

EU-mit aningaasaliiffigineqartoq

Qillerinerit misileraanerlu tamarmi EU-p Issittumi Ineriartortitsinissamut Aningaasaateqarfianit aningaasalersorneqarpoq, tassanilu ukiuni pingasuni 43,4 millionit koruunit immikkoortinneqarlutik Nunatsinni CO2-mik nunap ataani toqqorsisinnaanerup misissornissaanut atugassanik.

Taamaattumik ukiuni tulliuttuni misissuinerit amerlanerunissaat naatsorsuutigineqarsinnaavoq, tassa nunap aamma nunarsuup sananeqaataasa misissoqqissaarnissaannut tunngasut suli amerlanerusunik misilittagaqarfigineqarnissaat paasinarsippat, Naalakkersuisoqarfik taama ilisimatitsivoq.

Najukkami kiffartuussisunik suleqateqarneq

Ingerlatseqatigiiffik KSMS ApS qillerinernik ingerlatsisuuvoq. Ingerlatseqatigiiffik Savalimmiuni assingusunik qillerinernik misilittagaqarpoq, tamatumanili nunap ataani kissassutsimik atorluaanissaq siunertarineqarluni.

Ingerlatseqatigiiffiup najukkami kiffartuussisartut, ilaatigut Qasigiannguaneersut Qeqertarsuarmeersullu, pingaartumik nunaqarfimmi Kangerlummeersut, qillerivigineqartumit 15 minutsinik umiatsiamik ornittarialimmiittut atorluarsimavai. Najukkami innuttaasut ingerlatseqatigiiffiullu suleqatigiinnertik iluatsilluarpaat, periarfissaqalerpallu siunissami suleqatigiinnerup aallarteqqinnissaanut piareersimallutik, Naalakkersuisoqarfik taama ilisimatitsivoq.