Listeriamik kanngunartuliaq Esbjergimi kapisilinnik tunisassiortumut Polar Salmon Hjerting Laksimut kingunerlutsitsingaatsiarpoq.
Suliffeqarfiup Danmarkimi pisiniarfissuit marluk, Coop aamma Rema1000, pisisartoriunnaarpai.
Listeriamik kanngunartuliaq Esbjergimi kapisilinnik tunisassiortumut Polar Salmon Hjerting Laksimut kingunerlutsitsingaatsiarpoq.
Suliffeqarfiup Danmarkimi pisiniarfissuit marluk, Coop aamma Rema1000, pisisartoriunnaarpai.
Niuertarfiit taakku marluk Polar Salmon Hjerting Laksimik, ilaatigut kapisilinnik pujuukkanik mamarsaasikkanillu tunisassiortoq, suleqateqarnertik unitsippaat
Kapisillit listeriamik nappaatillit tunisassiarineqarnerannit qallunaat taakkunannga nerinerminnit ikinnerpaamik 27-t napparsimalersimapput, taakkunannga sisamat toqqutigalugu. Polar Salmon Hjerting Laks, Kalaallit Nunaanni aalisakkerivissuit namminersortut annersaata Polar Seafood Greenlandip piginneqataaffigisaanut Polar Seafood Denmarkimut, ilaavoq.
- Aalisakkat Polar Salmon Hjerting Laksimeersut pisiarisarunnaassallugit aalajangerpugut. Nioqqutissat ilaat ataasiakkaat sinneruttut pisiniarfitsinni suli pisiarineqarsinnaapput, taakkumi Listeriaqarnersut misissorneqarsimammata peqqissutsimut ajoqutaanatik.
- Nerisassanik eqqaaginnarusugata sinneruttut iginnagit suli tuniniassallugit, paasissutissiinermut pisortaq Jens Juul Nielsen Sermitsiamut mailikkut allappoq.
Danmarkimi niuertarfiit annersaata tulliata Coop-ip, niuertarfinnik Coop/Coop.dk-mik, 365discount-imik aamma Brugsen-imik piginnittup, kapisilinnik Polar Salmonimit tunisassiarineqartunit listeriamik nassaartoqarnikuunera pisisarunnaarnerannut pissutaavoq.
Rema1000-ip Polar Salmon Hjerting Laks aamma suleqatigiunnaarsimagaa suliffeqarfiup attaveqaqatigiinnermut akisussaanermullu pisortaata Jonas Schrøderip Sermitsiamut uppernarsarpaa.
Qallunaat ulluinnarni pisiarisartagaasa sisamararterutaat Rema1000-meersuupput.
Aakkut toqunartunitsitsisinnaallunilu qiteralulersitsisinnaasoq
Statens Serum Institutip paasissutissaatai naapertorlugit listeriamik nappaat nerisassatigut tuniluuttarpoq, bakteriamik listeria monocytogenesimik peqquteqartoq.
Aseruuttoorneq inunni akiuussutissakinnerusuni naartusunilu aakkut toqunartoqalernermik imaluunniit qiteralulernermik (meningitis) takussutissanittarpoq. Nappaat naartuumut aamma ulorianarsinnaasoq institutti nittartakkamini allappoq.
Salling suli pisisartuusoq
Danmarkimi niuertarfiit annersaat, Salling Group - Nettomik, Føteximik Bilkamillu pisiniarfiutilik - Coop-itut Rema1000-itullu annertuumik kinguneqartitsinngilaq.
Salling Groupip kapisilinnik tunisassiortup niuersinnaanera qulakkeerniarlugu kapisillit isumannaatsuunissaat qulakkeerniarlugu piumasaqaatit annertuut aamma aaqqissuussaanikkut allannguinerit arlallit atulersissimavai.
- Piumasaqaativut annertupput, nerisassat isumannaatsuunissaasa saniatigut aamma aaqqissuussaanikkut allannguisoqartariaqarsimavoq, Salling Groupimi tusagassiornermut pisortaq Jacob Krogsgaard Nielsen Sermitsiamut oqarpoq.
Polar Seafoodip tunisassiorfiani kapisillit suliarineqartut piffissami 2018-imiit 2024-mut inuit ikinnerpaamik 27-t listeriamik nappaateqalersimanerannut attuumassuteqartut Statens Serum Institutimiit uppernarsereeraalu Salling Groupip piumasaqaatiminik sukaterivoq.
Polar Salmon Hjerting Laksip tunisassiai Danmarkimi pisiniarfinnut tunisat tamarmik maanna listeriaqarnersut misissorneqartalertut aatsaallu listeriaqanngitsut uppernarsarneqareerput tunisassiorfimmiit anninneqartalertut Polar Seafood paasissutissiivoq.
Polar Salmon Hjerting Laks ukiumi naatsorsuusiorfiusumi kingullermi saqqummiunneqartumi 2023-mi, 60 millionit koruuninik isertitaqarsimavoq akileraarutillu ilanngaatigereerlugit 13 millionit koruuninik sinneqartoorsimalluni.
