Aalisarnermut tunngasunik Europap avannaani nittarsaassinerit
annersaanni, Danfishimi, Aalborgimi oktobarip arfineq-aappaannit
qulingiluaannut pisussami, Nunarput namminerisaminik nittarsaassiffeqassaaq.
- Suliffeqarfinnut assigiinngitsunut suleqatigisassatsinnut
isumaqatigiissuteqarnerit suli naammassinngilavut, kisianni immikkut ittumik
saqqummersitsiniarpugut, tassanilu kalaallit ukiuni 100-ni kingullerni
aalisarsimanerisa oqaluttuassartaa oqaluttuarissavarput, Aalborg Kongres- og
Kulturcenterimi tuniniaanermut pisortaq Lasse Holsteen Jessen oqarpoq.
Aalisarnermut tunngasunik Europap avannaani nittarsaassinerit
annersaanni, Danfishimi, Aalborgimi oktobarip arfineq-aappaannit
qulingiluaannut pisussami, Nunarput namminerisaminik nittarsaassiffeqassaaq.
- Suliffeqarfinnut assigiinngitsunut suleqatigisassatsinnut
isumaqatigiissuteqarnerit suli naammassinngilavut, kisianni immikkut ittumik
saqqummersitsiniarpugut, tassanilu kalaallit ukiuni 100-ni kingullerni
aalisarsimanerisa oqaluttuassartaa oqaluttuarissavarput, Aalborg Kongres- og
Kulturcenterimi tuniniaanermut pisortaq Lasse Holsteen Jessen oqarpoq.
Danfishimi Aalborgimi oktobarip arfineq-aappaannit qulingiluaannut pisussami 12.000-15.000-it peqataassasut aaqqissuisut naatsorsuutigaat.
Assi: Jesper Hansen
- Oqaluttuarineqartussat atuagassatigut assitigullu
oqaluttuarineqassapput, aamma sammisassaqartitsisoqarumaarpoq, ilaatigut
qarasaasiaq atorlugu piviusuusaartitamik isaruarsualerluni siutequtserlunilu
Kalaallit Nunaat misigineqarsinnaalluni, assersuutigalugu qimussertuusaarluni
imaluunniit aalisariutip qaavaniittuusaarluni. Aamma Nunatsinni nerisassianik
mamartunik immikkut ittunik misiliinissamut periarfissaqassaaq.
Nunatsinneersunik amerlasuunik saqqummersitsisoqassasoq
Saqqummersitsisussat Nunatsinneersut Nunatsinnut
immikkoortortami aamma saqqummersitsissapput. Aalisarnermut Piniarnermullu
Naalakkersuisoqarfik, KONFIFA, KNAPK, Nalunaarasuarnermut Aqutsisut, Tusass,
Qalut Vónin, Royal Arctic Line aamma Avannaata Kommunia saqqummersitsinissamut
peqataaniarlutik maannamut nalunaarsimapput.
Ulluni pingasuni saqqummersitsinissami nunanit 50-ineersunit
12-15.000-it peqataanissaat aaqqissuisut naatsorsuutigaat. Nunatsinneersut
amerlasuut Danfishimut peqataanissaminnut atatillugu ukiakkut
sulinngiffeqartarput – aamma kalaallit Danmarkimiittut amerlasuut
saqqummersitsinermut takuniaasarput, taamaattumik saqqummersitsisarneq
kalaallit naapittarfiattut ileqquulersimasutut saqqummersitsisunut
takuniaasunullu nunanit allaneersunut sunniuteqarlualersimalluni. Aalisarnerup
Nunatsinni aningaasarsiornikkut pingaarnersaanera qularutissaanngilaq.
Aammattaaq kalaallit kilisaataatileqatigiiffippassuisa
aalisakkanillu tunisassiorfiit ilarpassuisa Danfish isumassarsiorfigalugulu
niuernerminnut atortarpaat. Ingammik saqqummersitsinerup ulluani kingullermi
niuernikkut isumaqatigiissuterpassuit naammassineqartarput.
Danfish aamma Polarfish suleqatigiittut
Nunatsinni aalisartut Danfishimilu aaqqissuisut ukiuni
qulikkuutaanni qanimut suleqatigiissimapput. Aammami Aalborg Kongres- og Kulturcenter aamma saqqummersitsinermut
Polarfishimut, ukiut allortarlugit Ilulissani ingerlanneqartartumut – ukiuni
Danfiship Aalborgimi aaqqissuussiffiginngisaanni – teknikikkut
aaqqissuussisartuuvoq.
Lasse Holsteen Jessenip oqaatigaa, Danfiship aamma
aalisakkanik tukertitsiviit immikkoortortaqarfigilerumaarai, tassanilu
aalisakkanik tukertitsiviit imermik atoqqiinikkut 15-it 20-llu akornanniittut
saqqummersinneqartassasut.
- Tamatumunnga atatillugu nunanut allanut ministereqarfik
aamma Danske Maritime aamma suleqatigilerpavut, aalisarnerup saniatigut
suliffissuaqarnernut allanut tunngasunik allanik aamma
saqqummersitsisarniarluta.
- DanFish aalisartunut saqqummersitsiviujuaannassaaq,
aalisarnerlu pingaarnertut sammineqartassalluni. Saqqummersitsisulli 70
procentiisa missaasa imaatigut inuussutissarsiutinik allanik suliaqartut
saqqummersitsivigaat, taamaattumik takuniaasorpassuit taamaallaat aalisarnermik
sammisaqassanngitsut naatsorsuutigaarput, tassami anorip nukinganik
nukissiornermut, avataasiornermut, imaatigut assartuinermut, umiarsuarnut ikaartaatinut /takornariartaatinut allanillu
sammisaqassammata, Lasse Holsteen Jessen oqarpoq.