Inuussutissarsiortut sapiitsuliortuupput

Inatsisartunut marsip aqqarnani qinersisoqareerpat politikkerit sulilertussaapput.

Sulisitsisut pisortaata Inatsisartuni ilaasortanngortussanut suut kissaatiginerai paasiniarlugit Sermitsiap oqaloqatigaa.

- Inuiaqatigiinni tamani eqqarsartaatsit allanngortinneqartariaqarput, taamaalilluni namminersortut inuussutissarsiornerat aallarnisaanerullu pingaaruteqassusia kikkut tamarmik paasiniassammassuk. Tamanna politikerinut kissaatigaara annerpaaq – Inatsisartuni Naalakkersuisunilu ilaasortanngortussat tamatumunnga peqataasinnaapput, Keldsen oqarpoq, taassuma inuussutissarsiortut ataqqineqarnerunissaat kissaatigaa.

- Inuussutissarsiortut ulluinnarni sapiitsuliortuupput, tassami inuussutissarsiortut taakkuupput ineriartornermut atugarissaarnermullu naleqartitanik pilersitsisut – qinersineq qanorluunniit inerneqaraluarpat. Naleqartinneqarlutillu nersualaagassaapput.

- Inuussutissarsiornermi siuttut aallarnisaasullu Nersornaaserneqarnissaat eqqarsaatiginngilara, namminersortulliuku inuussutissarsiortut isornartorsiorneqartariaqartutut isigineqarnerat inuiaqatigiittut pisuunnguutiginavianngilarput. Illuatungerluinnaanilli. Kalaallit Nunaata siunissaa pilersinneqassappat assaat tamaasa atorfissaqartipparput.

Inuiaqatigiinnut iluanaarutaasoq

- Kalaallit Nunaanni suliffeqarfinni inuiaqatigiinnut naleqartitat pilersinniarlugit ullut tamaasa ilungersorluni sulisoqartarpoq – sannavimmi mikisumi aallarnisaasuuppat imaluunniit suliffeqarfissuarmi pisortaagaluarpat apeqqutaanani. Pilersitsipput tuniniaallutillu – tamannalu inuiaqatigiinnut iluanaarutaavoq. Toqqaannartumik akileraarutitigut, sulisut akileraarnerisigut minnerunngitsumillu suliffinnik ilinniartunullu suliffinnik misiliiffissanik pilersitsinikkut.

Namminersortut inuussutissarsiornerat Kalaallit Nunaanni atugarissaarnissamut pingaaruteqartoq Christian Keldsenip poortorlugu oqaatiginngilaa.

- Suliffeqarfiit namminersortut inuiaqatigiinnut periarfissaqalersitsillutillu sinneqartoortitsisarput, taamaalillutalu atugarissaarnissarput ingerlatiinnarsinnaallugu. Pisortat ilaatigut sanngiinnerpaartatsinnik utoqqalinersialinnillu isumassuisuullutik. Inuiaqatigiimmi taamaattut tamatta kissaatigaagut – politikkikkut qanorluunniit inissisimagaluarutta, Christian Keldsen oqarpoq.

Inuussutissarsiornermut sinaakkutit politikerit eqqumaffigisariaqarnerat pingaaruteqartoq Sulisitsisut isumaqarput.

- Inuussutissarsiortut aalajaatsunik sinaakkutissaqarnissaasa pisariaqarnera puiorneqassanngilaq.

- Sinaakkutit pingaaruteqarput. Tapiissutinut periarfissat amerlanerusut inuussutissarsiortunut aalajangersimasunut tunngatinneqartartut pisariaqartinngilavut, akerlianilli inatsisit pitsaasut pisariaqartippagut inuussutissarsiortunut pitsaasunik assigiimmillu atugassaqartitsisut – assersuutigalugu akileraartarnermut tunngatillugu.

Inatsisit annertuumik sunniutillit

Inatsisit annertuumik sunniutillit siorna akuersissutigineqartut inuussutissarsiortunut ajortumik sunniuteqarnissaat Christian Keldsenip ernumassutigaa.

- Inatsisartuni inatsisit annertuut arlallit inuussutissarsiortunut namminersortunut sunniuteqartorujussuit akuerineqarsimapput. Aalisarneq pillugu inatsit, takornariaqarnermut inatsit aamma aatsitassanut inatsit kalaallit inuussutissarsiortut isumannaarneqarnissaat kissaatigalugu akuerineqarput. Tamakku tamarmik pitsaanerpaamik siunertaqarlutik. Politikerit periaasii tamatigut isumaqatigineq ajorpavut, ajoraluartumilli nassuerutigisariaqarparput inuussutissarsiortut ilarpassui maannakkut ineriartornissamut pitsaasunik sinaakkuteqannginnerat. Inatsisit ineriartornissamut periarfissanut qularnanngitsumik ajortumik sunniuteqassapput.

- Piffissami nunarsuarmi tamarmi Kalaallit Nunaat soqutigineqarfiani ineriartortitserusuffiusumilu – Kalaallit Nunaata aningaasaqarnera aningaasaliissutinit, minnerunngitsumik nunanit allanit, pilersorneqartariaqarnera pingaaruteqarpoq paasissallugu. Taamaattumik immitsinnut mattutissanngilagut. Aatsitassarsiorneq takornariaqarnerlu suliffeqarfinnut nunanit allaneersunut attuumassuteqarluinnarput – aamma aalisakkanik tuniniaaneq nunarsuarmi aalisakkanik tuniniaaviit isumalluutigai, Christian Keldsen nassuiaavoq.

- Nunanut allanut attaveqarnerput ineriartornermut tunngaviuvoq, taamaanngippat kisitta aningaasaliisarlutalu atuisuussaagut.

Aallarnisaasut pisariaqartinneqartut

Christian Keldsenip kalaallit aallarnisaasut atugarissaarnerunissaat aamma kissaatigaa.

- Sinaakkutit sulinerup aallarnisaanerullu imminut akilersinnaanera pisariaqarpoq. Taamaattumik politikerit aallarnisaasunut pitsaanerusumik sinaakkusersuisariaqarput, taakkumi allaffissornikkut pappialarsornikkullu pisarissersorneqassanngillat.

Nunanit allaneersunit sulisussarsiorneq ajornannginnerulersinneqartariaqartoq Sulisitsisut ukiorpassuarni sulissutigisimavaat – ilaatigut sukkanerusumik sulilersitsisarneq aqqutigalugu. Tamakku aaqqissuussat suli pisariaqarput.

- Inuussutissarsiorneq Kalaallit Nunaanni ineriartortitsiinnassappat sulisut pisariaqartinneqartut atorfissaqartinneqarput. Tamatumunnga tunngatillugu Inatsisartuni ilaasortat inuussutissarsiortunut ikiuisinnaapput, Sulisitsisuni pisortaq isumaqarpoq, aamma ilinniartitaaneq pitsanngorsarneqartariaqartoq taanna isumaqarpoq.

- Inuit amerlanersaat imminnut ilaquttaminnillu isumaginnissinnaassappata ilinniagaqarnissaq pingaaruteqarpoq, aammali nassuerutigisariaqarparput suliassamut angisuumut, tassa Kalaallit Nunaata aqunnissaanut inuussutissarsiornermillu ineriartortitsinissamut, innuttavut naammannginnerat.

- Taamaattumik nunanit allanit suliartortut iluaqutaanissaat politikikkut inissinneqartariaqarpoq. Inuit tikisinneqarnissaat, inooqataanissaat inuiaqatigiinnullu akuusinnaalernissaat tassani eqqarsaatigalugit.

- Pingaarnerpaamilli nunanit allanit suliartortut inuiaqatigiit ingerlalluarnissaannut pingaaruteqarnerat politikerinit oqariartuutigineqarnissaa pingaaruteqarpoq. Aalisartut aalisakkanik tunisassiorfimmit ikiorneqaratik tunisisinnaanngillat. Nakorsamik tikisitsisoqanngippat napparsimasut katsorsarneqarsinnaanngilagut – ilaalu ilanngullugit. Arlaannaalluunniit arlaannik arsaartuinngilaq – allalli iliuuseqarnerunissaannut periarfissarsiortoqartarluni, Christian Keldsen nassuiaavoq.