Kangerluup naqqa 125.000 m3 angitigisoq imaarsarneqartoq

Sikuki Nuuk Harbourip Kangerlussuup talittarfiata itinerulernissaanik suliaqarnini, umiarsuit takornariartaatit tikerarnissaat sioqqullugu, juulip naanerani naammassivaa. Umiarsualivik orsersuiffittaarlunilu nutaamik puttasoqalerpoq.

Sikuki Nuuk Harbourimit Mikkel Nonboe oqarpoq. Taakku Kangerlussuarmi talittarfik 2023-mi maajimi akisussaaffigilerpaat.

- Itisuunngortitsineq saliinerullu kingorna umiarsualivik 48 meterinik silissuseqarpoq. Tininnganerpaaffiani imaq 3 meterisut itissuseqartalerpoq, taamaattumik umiatsiat angilaartut tulassinnaallutik, Mikkel Nonboe oqarpoq.

- Umiarsuarnut aqqutip suliarineqarnera siornali aallartippoq, ukioq mannali suliarineqarnerulluni. Umiarsuit takornariartaatit tikeraleruttulerfianni naammassisinnaanerput nuannaarutigaara.

Suliarujussuaq

Aqqartartut suliffeqarfiat Polar Dive Nuummeersoq suliaqartuuvoq.

- Suliffeqarfiup ukiuni qulingiluani pioreernerani suliassamik aatsaat taama sivisutigisumik suliaqarpugut, Polar Divemeersoq Peter Rosvig Pedersen oqarpoq.

- Siorna aggustimi septembarimilu aallartippugut, 45.000 m3-illu missaat nuuppavut. Ukioq manna juunimi juulimilu 80.000 m3-it missaat nuuppavut. Tassa katillugit 125.000 m3-it missaat nuuppavut. Sualuit immaq naqqaniittut minnerpaamik meterinik 20-nik ititigisumiittut tamarmik peerput.

Kangerlussuup talittarfianik itisuunngortitsineq Polar Divemit aningaasaliissuteqarfigineqangaatsiarpoq. Sulinermi atugassamik Hollandimi ”cutter suction dredger”-imik sanatitsisuuvoq. Taassaavoq puttasoq marallummiissinnaasoq, immap naqqanut assaatilik. Assaataata nuua kaavittarpoq milluaateqarlunilu.

- Maskiina - Puttasoq - Hanstholmimi sanatitarput 2024-mi Nuummukaanneqarpoq. Puttasoq norskit kalittaataannik Nuuliaanneqarpoq, Peter Rosvig Pedersen oqarpoq.

Suck It Up

- Nuumminngaannit uagut kalillugu Kangerlussualiaapparput. ”Cutter suction dredgeren” - Suck it Up-imik (Milluaruk, aaqq.) - taaguutilik tulattarfimmut aavarput. Sumiiffimmilu sanaartugassanik suliakkerneqartartup imaanut aqqarpaa.

Polar Divemi sulisut talittarfimmik itisuunngortitsinissamik suli suliaqalertigata taassuma atornissaa ilinniaqqaartussaavaat.

- 2024-mi sulinitsinni ukioq siulliummat aatsaallu misiliigatta unammilligassaqaaluppugut. Hollandimiit immikkut ilisimasalimmik tikeraartoqarluta qanoq sulisarnissatsinnik ilitsersuunneqarpugut, kingornalu namminiilerluta, Peter Rosvig Pedersen oqarpoq.

- 2025-mi soorunami ajornannginnerulaarpoq. Umiarsuit aqqutissaannik itisuunngortitsinerput naammaginartumik naammassillugu Sikukimut najukkatsinnilu innuttaasunut tunniussisinnaagatta tulluusimaarutigaarput – naammassineqarnissaa qaammammik sioqqullugu, umiarsuillu takornariartaatit ulloq taannarpiaq tikiffianni.

- Sanaartortitsisup, sanaartornermut siunnersortip Polar Divellu suleqatigiilluarnerat suliami tamarmi malunnaataavoq. Tatigeqatigiilluartoqarpoq – tamannalumi Hollandimi sanaartortitsinermiit suliniutip naammassinissaata tungaanut piumassuseqartitsilluni, Peter Rosvig Pedersen oqarpoq.

Orsiivik nutaaq

Umiarsuarnut aqqutip itinerulersinneqarnerata saniatigut tulattarfiup kitaatungaani Sikuki Nuuk Harbour orsersortarfiliortitsivoq.

- Imaatigut angalasut orserniarlutik siornatigut mittarfiliaasaraluarput, maannali Kangerlussuarmi talittarfimmi toqqaannartumik orsersortoqarsinnaalerpoq. Orsertarfik nutaaq kortimik akiliivigineqarsinnaasoq ulloq unnuarlu atorneqarsinnaavoq, Mikkel Nonboe Sikukimiit nassuiaavoq.

- Aammattaaq Kangerlussuarmi talittarfimmi puttasuliivugut. Taanna pisoqqamit takineruvoq, taamaattumik umiatsiat inissaqarluarnerulerput. Piniartorpassuarnit tuttunniarfiusumi Kangerlussuarmut maanna tikeraartunit atorluarneqarumaartoq qularutiginngilarput.