KNI Danmarkimut atisaarniartoq

KNI arlalitsigut ilungersuangaatsiarpoq. Nunatsinni inoqarfiit minnerit inuerukkiartuinnarput, suliffeqarfik akitsuusigaanngitsunik Kangerlussuarmi tunisakillingaatsiarpoq Narsamilu savanik toqoraavia Neqi aningaasaqarniarnikkut ajornartorsiungaatsiarluni.

Aammali ingerlalluarfeqarpoq. Pilersuisoqarfiummi KNI-p nammineq tunisassiai Meqqusaalimmik meqqillit niuertarfinni internettikkullu tunisaalluarput.

Tamannalu tassa KNI-p nammineq tunisassiaminik Meqqusaalinnik Danmarkimut nittartakkamigut Meqqusaalik.gl-kkut nioqquteqalerneranik kinguneqarpoq.

- Nammineq tunisassiatsinnik Meqqusaalimmik meqqilinnik Danmarkimut nioqquteqalernerput atisat aneerutissaqqissut pinngortitami sammisaqartartut amerliartuinnarnerisa ilutigisaanik piumaneqaleraluttuinnarnerannik atorluaaneruvoq. Tassa atisat arpaatsit uani pineqarnatik atisalli aneerutissaqqissut sullisissaqqissullu pineqarput, KNI-p nittarsaassinermut pisortaa Anders Stenbakken oqarpoq.

Killormoortoq

KNI-p nammineq tunisassiaminik Danmarkimi nioqquteqalernerata nunatta Danmarkillu kulturikkut ataqatigiinnerulernerannik kinguneqassasoq, nittarsaassinermut pisortap aamma neriuutigaa.

- Nunatsinni nioqqutissaativut Danmarkimeersut amerlasoorujussuupput, uagullu avammut tassa Danmarkimut maannamut tunisartakkavut tassaakkajullutik aalisakkat qaleruallillu taavalu puisit amiinik tunisassiat.

- Taamaammat tunisassianik nutaanik nunatsinniit Danmarkimut niueruteqartartunut ilanngunnerput pitsaalluinnartuusoraara. Ingammillu atisaliatta Meqqusaalimmik meqqillit kulturitsinnut ulluinnarnilu inuunitsinnut ilaalluinnartuunerat eqqaassagaanni. Atisanik aneerutissaqqissunik nungullajaatsunillu qallunaanut neqeroornitta ilutigisaanik uagut kalaallit kulturitsinnik nutaamik paasinnittariaaseqalersissimagutsigit, taava pingaarutilimmik angusaqarsimassaagut, Anders Stenbakken oqarpoq.

KNI-p nammineq atisaliatik Meqqusaalimmik meqqillit nunatsinni ukiuni qulingiluani pilerisaarutigalugillu tuniniarsimalereerluni Danmarkimut tassa nioqqutigisalerpai. Nunatsinni niuertarfinni Pilersuisuni siullermik kingornatigullu ilaatigut Nuummut tassa Pilersuisoqarfiunngitsumut nittartakkatigut nioqqutigisalerpai.

Aitsaliaat Meqqusaalimmik meqqillit nunatsinni atuisunit qujarunneqarput.

- Qanoq tunisaqartigisimanerluta aatsaannguummat misissorpara. Ullumikkut allatsitsereersimalertut 62-iupput, taakkualu nunatsinneersuinnaapput. Tassa tunisaalluarput – nunatsinnilu tamaginni nioqqutigalutigit, Anders Stenbakken Sermitsiamit sapaatip akunnerata siuliani oqaloqatigigatsinni oqarpoq.

Atisat aneerutissaqqissut taakku nunatsinni nioqqutaalerneranniit ukiorpaaluit qaangiussimalerput.

- Uummannami niuertutta kajumissaarinerata kingornatigut tassa 2016-imi nioqqutissiarisalerpavut. Sumiiffimmi tassani aalisartorpassuaqarlunilu piniartorpassuaqarpoq, atisallu nunatsinni atugassaqqilluinnartutut naleqqussakkat taakkunannga piumaneqarluartuupput, Anders Stenbakken oqarpoq.

Piniartunit misilittarneqartut

- Siullermik annoraaliorpugut. Taakkualu misilittaasussatut suleqatiserisatsinnit tassa piniartunit aalisartunillu nunaqavissunit silarluttumi, inuilaarsuarmi, piniarnermi ulluinnarnilu misilittarneqarput. Pitsaassusaannik nalilersuipput, uagullu ilusaat taakkua naliliineri aallaavigalugit nalerisarpavut – tamannalu iluatsitsilluarfiulertorpoq.

- Siuaasatta ukiuni tuusintilikkuutaani atisalioriaaserisimasaat atisaminnillu pitsanngorsaariaaserisimasaat – taavalu puisit amii uumasullu meqqui atornagit annoraassiassaliallu ussilluinnartut sitsiaalluinnartullu soorlu PrimaLoftitut ittut taavalu savat ilaat merinot meqqui atorlugit pilersinnissaannut tunngavigaavut.

Atisaliarisartagaat Meqqusaalimmik meqqillit assigiinngitsorpaaluupput, annoraartaalli suli tassa maannamut tunisaanerpaapput.

- Annoraaliavut suli maannamut tunisaanerpaapput, allatulli ilusilersukkanik nunatsinni atugassaqqissutut aamma naleqqussakkanik aamma ilaqaalupput – taakkualu ulluinnarsiutissaqqissuupput, Anders Stenbakken nassuiaavoq.

- Nittarsaannissaat pivallaarnagu tunisassiarinissaat ukiuni siullerni salliuttorujussuuarput. Tamanna atisaliatta oqaluttuassartaat tunngavigalugit nittarsaattalernerinik kinguneqartumik 2022-mi allanngortipparput. Tassanilu Toornatoqaq inunnik nuannarinnilluartoq – qanorluunniillu pisoqaraluaraangat isaannatsinnik takusinnaasavut akimorlugit illersuisartoq Meqqusaalik tunngavigaarput.

- Nunanik allanik nittartakkakkut aamma nioqquteqartartunik unammillerteqarnerput, aammali Nuummiit tassa Pilersuisoqarfiunngitsumit piumaneqarnerulernerat, nittarsaannerulernerannut pissutaaqataapput.

Asiami nioqqutissiaasut

Meqqusaalimmik meqqilinnik aalajangersimasumik atisaliortartoqanngilaq.

- Ilusissaattut isumassarsiat periarfissallu Sisimiuni qullersaqarfitsinni oqaloqatigiissutigisarpavut – qanorlu iluseqassanersut aalajangereeraangatta Sverigemi suliffeqarfiit ilaannut titartaqqissaagassanngortittarpavut. Namminerli atisaliavut Meqqusaalimmik meqqillit Asiami nioqqutissiarineqartarput, Anders Stenbakken ilisimatitsivoq.

KNI atisat Meqqusaalimmik meqqillit saniatigut allanik nammineq aamma tunisassiaminik nunatsinni aamma nioqquteqaaluppoq.

- Kalaalerpaluttunik allanik soorlu oqorutit qaliinik, nerriviup qaliinik, tillingiartuutinik, nallukattanik juullerpaluttunillu aamma nioqqutigaavut. KNI kalaallit pigaat – taamaammallu kulturitta nukittorsarnissaa pisussaaffigilluinnarlutigu. Pisussaaffippullu taanna ilaatigut tassa kalaalerpaluttunik nioqquteqarnikkut naammassisarparput, Anders Stenbakken oqarpoq.