KNR-itoqaq inissianik taarserneqassaaq

Kissarneqqortuunnguami KNR-ip TV-qarfikuata qanoq atorneqarnissaata aalajangerniarnera sivisusimavoq.

Illu ima oqoqartigilersimavoq tassani sulineq illersorneqarsinnaajunnaarluni, tamanna 2013-imi paasineqarmat inissiaq qimanneqapallattariaqarsimavoq. Taamanili inissiaq aserfallakkiartorusaarpoq, ukiullu ingerlaneranni ilaatigut meeqqat inuusuttullu pujortarniakujuffigisarlugulu imigassartorfiginiartarpaat ilaatigut ikuallattoortoqartarluni, AG-p 2020-mi tamanna allaaseraa.

Tamaangali killeqarpoq.

Pilersaarutit malillugit ingerlasoqassappat illoqarfiit pingaarnersaanni illu kusanaannerpaat ilaat oqaluttuaannanngussaaq, qarasaasialerinermik aallarnisaasuusimasoq inissianut aningaasaliisartoq Inu:IT Bolig A/S-imeersoq Martin Gjødvad paasissutissiivoq.

Upernaaru isaterinerup aallartinnissaa naatsorsuutigaa.

- Sanaartornissamut akuersissummik qanittukkut pissarsisinnaassalluta neriuutigaarput, taavalu isaterineq aallartissaaq. Neriuppunga aasamut nungullugu isaterneqarsimassasoq, Martin Gjødvad AG-mut oqarpoq.

Inissiat marluk 2026-mi ukiakkut, ukiup aappaata affaata missaa qaangiuppata, piareersimassasut aamma neriuutigaa.

Namminersorlutik Oqartussat illu pigisaat ukiut arlallit matuma siorna illunik ineriartortitsisartumut Vagn Andersenimut tunivaat, taassumalu Martin Gjødvadimut ukiup 2023-miit 2024-mut nikinnerani illu tuniniarlugu neqeroorutigaa.

Illup toqqaviani pilersaarutit naapertorlugit inissiat 72-it mikinerumaat sananeqassapput:

- Pineqartut tassaapput inissiat 54 kvadratmeterit sinnerlugit angissuseqartut. Inissiat mikisut illoqarfimmi amigaataasut, Martin Gjødvad oqarpoq, ilanngullugulu oqaatigalugu quleriit allersaanni caféqarluni, allaffeqarluni pisiniarfeqarumaartoq.

Illup avannaani pisuinnaat qanoq aqquteqalersinnaanerat, aammali angallannikkut pissutsit eqqarsaatigalugit qatserisartut aqqutaannik isumannaatsunik aamma biilinut uniffissat naammattut qanoq qulakkeerneqarsinnaanersut sanaartortitsisup Kommuneqarfik Sermersooq suleqatigalugu maanna pilersaarusioritsik aamma oqaatigaa.

Oquk asbestilu

KNR-itoqqap isaterneqarnera ajornaatsuinnaanngilaq.

Illup iluani oqoqarnerata saniatigut inissiaq aamma asbesteqarpoq, taamaattumillu "eqqakkat immikkoortiterneqartariaqartut" Martin Gjødvad oqarpoq.

Toqqorsivimmiittuutinik suli tassaniittoqaanerartarneq ilumuunnginnerarpaa.

- Illu imaqanngilaq oquinnaallunilu, taamaattumik oqaluttuarisaanermut tunngasunik tigussaasoqanngilaq, oqarpoq.

Illuliaq nutaaq avatangiisinut qulakkiingaassasoq Martin Gjødvad oqarpoq, inissiarlu nutaap Kalaallit Nunaanni sanaartornermut tunngatillugu nutaaliaasuussalluni: FSC-mit (Forest Stewardship Council) akuerineqartut atorlugit sananeqassaaq, taanna nunani tamalaani nalunaaqutsersueriaasiuvoq taamaalilluni qisuit orpippassuarnit akisussaassuseqarluni aqutsinermit pissarsiarineqartut qulakkeerneqarsinnaallutik. Inissiap naqqa kisimi betonngimik sanaajussaaq.

Sanaartugaq "Svanemærke" aallaavigalugu sanaartugaassaaq, tassa Danmarkimi avatangiisinut ministeriaqarfik naapertorlugu "avatangiisinut piumasaqaatinik sukannersunik naammassinnittoq, inuit peqqissusaannik qajassuussisoq pitsaassutsimillu pitsaasumik qulakkeerinnittoq".

- Sanaartugaq annertuumik oqorsaasersugaassaaq, Kalaallit Nunaanni oqorsaasersueriaatsinit maleruagassanit maanna atuuttunit pitsaanerungaartumik. Tamatuma saniatigut inissiat tamarmik immikkut silaannarissarfilersorneqassapput, kiassarneqarneq tamakkiisumik atorluarniarlugu aamma illup iluata silaannarissuunissaa kiassarnermullu akiliutit pitsaanerpaanissaaq qulakkeerniarlugu. Naatsorsuutigaarput inissiani kiassarnermut aningaasartuutit ikinnerussasut, Martin Gjødvad oqarpoq.

Akit niuernermut naleqquttut

Sanaartorneq maanna inissianik tuniniaanermit akisunerussanngitsoq, aamma kvadratmeterimut 30.000 koruunit sinnerlugit tunineqarnavianngitsoq aningaasaliisartup qulakkeerpaa.

Tassa inissiaq 54 kvadratmeterisut angitigisoq 1,6 millionit koruunit missaannik akeqassaaq.

Inissiat ikkussuuteriaannaat sananermi atorneqassapput, qallunaatut modulbyggeriimik taaneqartartoq. Modulit 88-it umiarsuakkut ataatsikkut tikissapput. Pisortanit taarsigassarsisinnaaneq atorunnaarnikuunera, erniat suli qaffasippallaarnerat sanaartornerillu nalinginnaasut akii qaffarujussuarsimanerat Martin Gjødvadip modulinngorlugu sanaartornissamik aalajangernermut tunngavilersuutigai.

- Sanaartorneq ukiut marluk missaanniit ukioq ataaseq inorlugu sananeqarnissaannut sivikillissaaq, taamaalilluta erniat appartissinnaallugit, Martin Gjødvad oqarpoq.

Sanaartorneq tamanna Kalaallit Nunaannut akileraarutit aqqutigalugit iluanaaruteqartitsivallaarunnanngitsoq nassuerutigaa. Sanaartornerummi annerpaartaa Danmarkimi illup iluani pisarmat.

Imatulli oqarpoq:

- Aammali qallunaat tikisitat pisariaqartinneqassanngillat, suliassammi sinneri suliffeqarfinnit nunaqavissunit suliarineqarsinnaammata.