Kujataani kattunnissaarsuaq

Diskolinep 2024-mut ukiumoortumik naatsorsuutit saqqummiuteqqammerpai. Topas Explorer Group, umiarsuaatileqatigiiffinnik Diskolinemik aamma Blue Ice Explorerimik piginnittoq, ingerlatseqatigiiffinnik taakkuninnga marlunnik kattutsitsiniarluni aalajangermat kingusinaalaartumik saqqummiunneqarput.

Ukiumut naatsorsuutit, Diskolinemut aamma Blue Ice Explorerimut atuuttut, suliffeqarfiup ingerlalluarneranik 2,79 million koruuninillu sinneqartooruteqarneranik takutitsisut – siorna 2,22 million koruuninit 25 procentinik qaffariaateqarput. Nammineq aningaasaatit 42 million koruuninit 64 million koruuninut qaffariarput.

Diskoline kattunnermi kingorna katillugit 15-inik angallateqalerpoq, taakku Kujataaniit Qeqertarsuup Tunuanut angallassisarput. Angallat hybridi Maliina Ittuk, arlaleriarluni misilinneqareerluni suli atorneqanngitsuusoq, maannalu Frederikshavnimi amutsivimmiittoq taakkununnga ilaavoq.

Maliina Ittuk 113-inik ilaasoqarsinnaasoq suli aningaasartuutaanngitsumik misiliutitut atorneqarsimasoq ukiumoortumik naatsorsuutit takutippaat. Umiarsuaq naatsorsuutit immikkoortuani ”Pigisat nalillit suliarineqartut”-mi 93.467.692 koruuninik naleqartutut allassimavoq.

Misiliineq akisooq

Maliina Ittuk akisuunik unammillernartoqarsimasoq Diskolinemi Topas Explorer Groupimilu pisortaanerup Michael Højgaardip nassuerutigaa.

- Kujataani Qeqertarsuullu Tunuani angallassineq pillugu Naalakkersuisunut ukiuni qulini kiffartuussinissamut isumaqatigiissuteqarpugut. Tamanna tunngavigalugu annertuumik aningaasaliinissamut sapiissuseqarpugut, tamannalu angallassisinnaanerup annertusinissaanut eqqortumik aaqqiissutissaasoq suli isumaqarpugut.

- Ajoraluartumik suli anguniagaq naammassisimanngilarput, taamaammat Maliina Ittuk aatsaat aasaanerani sulinngiffeqarnerup kingorna Nunatsinnut tikissasoq maannakkut naatsorsuutigalugu Naalakkersuisunut ilisimatitsissutigaarput. Qujanartumik pilersaarutit allanngortinngillat. Kiffartuussinissamut isumaqatigiissummi pisussaaffigut naammassiniarlugit umiarsuaatitat nikerartittalerpagut.

Topas Explorer Group Diskolinemut Blue Ice Explorerimullu kattutitereeraluartoq Kujataani angallannermut allannguuteqarujussuanngilaq. Ingerlatseqatigiiffiit taakku marluk ilaatigut Narsarsuup Qaqortullu akornanni angallannermik pingaarutilimmik ingerlatsigamik Kujataani attaveqaasersuutinut pingaaruteqarput.

- Kattunnerup kingunerisaanik Blue Ice Explorerip umiarsuaatai niuernermilu suliassat allat Diskolinemut nuunneqassapput, pingaarnertut allaffissornikkut pisariillisaanissaq siunertaralugu, Blue Ice Explorerili namminersortutut ingerlaannassaaq. Diskoline Blue Ice Explorerilu ukiorpassuarni qanimut suleqatigiissimammata kattutereernerup kingorna ulluinnarni ingerlatsineq allannguuteqarnavianngilaq, Michael Højgaard nassuiaavoq.

Angallasseriaaseq nutaaq

- Qaqortumi mittarfik nutaaq aappaagu ammarpat angallasseriaaseq allanngorumaarpoq – tamannalu aamma kattunnermut pissutaavoq.

- Narsarsuarmi nunanut tamalaanut mittarfik matuneqarpat, Qaqortumilu nunap immikkoortuani mittarfik nutaaq ammarneqarpat kiisalu Nuummi mittarfik nutaaq ammarneqareermat Kujataani angallannikkut aaqqissuussineq allanngorluinnassaaq. Tamanna soorunami iliuuseqarfigissavarput.

- Kujataani nunaqarfiit najugaqartullu ataavartumik, pitsaasumik siunissamilu ungasissumut kiffartuussineq qulakkeerniarlugu nukigut ingerlatseqatigiiffimmut ataatsimut kattuppagut.

Ingerlatseqatigiiffiit taakku marluk juunip aallaqqaataanit kattunneqarput. Naatsorsueqqissaartoqarsimavoq – taamaammallu Diskoline ApS-ip 2024-mut ukiumoortumik naatsorsuutai aatsaat qanittukkut saqqummiunneqarput.

- Ingerlatseqatigiiffiit taakku marluk kattunnerisa kingorna Blue Ice Explorerip unnuisarfii – Igalikumi akunnittarfik Narsarsuarmilu asimiittunut unnuisarfik – kiisalu ingerlatseqatigiiffiup angalatitsisarnermik suliaqarnera aamma Disko Linep ataaniilertussanngorput, Blue Ice Explorer-illi ilisarnaataa atorlugu ingerlanneqassallutik, Michael Højgaard ilisimatitsivoq, taassumali unnuisarfiit Topas Explorer Groupip akunnittarfinnut immikkoortortaqarfianut ilanngunneqarnissaat – ilaatigut Ilulissani Hotel Icefiordip Qeqertarsuarmi Qasigiannguanilu akunnittarfiit peqatigalugit - sulissutigineqartoq erseqqissarpaa.

Narsarsuarmit nuussasut

Diskoline Ilulissani qullersaqarfeqarpoq, Kujataanili mittarfik nutaaq illoqarfimmi ammarneqarpat allaffik Qaqortumut nuunneqarumaarmat siunissami Blue Ice Explorerip qullersaqarfiata nuunneqarnissaa pilersaarutaavoq.

- Ingerlatseqatigiiffiit taakku marluk ukiuni arlalinni Kalaallit Nunaanni sulinermi tunngavigisimasaasa nukittuut – ilaasunut, najukkami innuttaasunut suleqatitsinnullu iluaqutaasumik - ineriartorteqqinnissaat qilanaaraarput, Michael Højgaard oqarpoq.

Ingerlatseqatigiiffik sulisunut aningaasartuutinik katillugit 29.627.739-nik atuisimasoq Diskolinep 2024-mut ukiumoortumik naatsorsuutaani atuarneqarsinnaavoq. Aningaasat taakkua amerlanersaat sulisut, tamarmik Kalaallit Nunaanni akileraartartut, aningaasarsiaannut atorneqarsimapput. Sulisut ukiukkut 25-t aasakkullu 110-t missaanniittarput. Ulloq naallugu sulisartut 2024-mi agguaqatigiissillugu 54-iupput.

Diskoline piginneqatigiiffiuvoq, taamaammallu siulersuisoqanngilaq.